गण्डकी प्रदेशकी सामाजिक विकास मन्त्री तथा सांसदहरुले नै गरे लकडाउनको अवज्ञा

म्याग्दी ,मंगलबार बैशाख ०९ गते ।
कोरोना महामारी रोक्न आह्वान गरिएको लकडाउनलाई अवज्ञा गर्दै म्याग्दीमा अभिमुखीकरण कार्यक्रम गरिएको छ । मन्त्री ,सांसद,जनप्रतिनिधि तथा प्रशासन लगायतको उपस्थितीमा देशमा जारी कोरोना भाइरसविरुद्धको लकडाउन तथा एकै ठाउँ २५ भन्दा बढी मानिस बेला हुन नपाइने नियमलाई उल्लंघन गर्दै भीड जम्मा गरेर गण्डकी प्रदेशको सामाजिक विकास मन्त्रालय अन्तर्गतको स्वास्थ्य निर्देशनालयले आइतबार म्याग्दीमा अभिमुखिकरण कार्यक्रम गरेको हो ।

तस्बिर ः स्वास्थ्य कार्यालय म्याग्दी

सो कार्यक्रममा गण्डकी प्रदेश सामाजिक विकास मन्त्री नरदेबी पुन ,प्रतिनिधि सभाका सदस्य सांसद भुपेन्द्र बहादुर थापा ,प्रदेश सभा सदस्य सांसद विनोद केसी ,जिल्ला समन्वय समितिका प्रमुख देवेन्द्र बहादुर केसी , पश्चिमाञ्चल क्षेत्रीय स्वास्थ्य निर्देशनालय पोखराका माइक्रोबायोलोजिष्ट धर्मराज भट्ट, बेनी अस्पतालका चिकित्सक र स्वास्थ्यकर्मी, कोभिड–१९ कमाण्ड पोष्ट, जनप्रतिनिधि र सुरक्षा अधिकारीहरु लगायतको उपस्थिती रहेको थियो ।

सरकारले २५ जनाभन्दाबढी मानिस भेला हुन समेत रोक लगाएको अवस्थामा भिड जम्मा गरेर कार्यक्रम आयोजना गरेको भन्दै सरोकारवालाहरुले विरोध जनाएका छन् । नागरिक समाजका संयोजक सुदर्शनकुमार श्रेष्ठले निति, नियम पालना गराउने निकायबाटै उल्लंघन हुनुले समाजमा सकरात्मक सन्देश नजाने बताए । नेपाल पत्रकार महासंघ म्याग्दीका उपाध्यक्ष ठाकुर प्रसाद आचार्यले २५ जना भन्दा बढी मानिस भेला भएर गरिने कार्यक्रमले लकडाउनको नियम उल्लंघन हुने बताए ।

तस्बिर ः स्वास्थ्य कार्यालय म्याग्दी

यता स्वास्थ्य कार्यालय म्याग्दीका प्रमुख एकनारायण लम्सालले लकडाउनको समय भएपनि स्वास्थ्यकर्मीको क्षमता विकास गर्ने उद्धेश्यले दुरी कायम गरेर कार्यक्रम संचालन गरिएको प्रतिक्रिया दिए । उनका अनुसार बेनी अस्पतालका चिकित्सक र स्वास्थ्यकर्मीका साथै, कोभिड–१९ कमाण्ड पोष्ट, जनप्रतिनिधि र सुरक्षा अधिकारीहरुलाई कोरोना संक्रमितको पहिचान, उपचार र व्यवस्थापनका साथै सामग्रीको प्रयोगका बारेमा अभिमुखीकरण गराइएको हो ।

तस्बिर ः स्वास्थ्य कार्यालय म्याग्दी

‘माननिय मन्त्री, सांसदज्युहरुको उपस्थितीमा म्याग्दी सदरमुकाम बेनी स्थित जिल्ला समन्वय समितिको सभाहलमा विशेष गरी कोरोना भाइरस विरुद्धको लडाइमा खटिएका स्वास्थ्यकर्मीहरुको क्षमता विकास गर्ने उद्धेश्यले अभिमुखीकरण कार्यक्रमको आयोजना गरिएको हो ,’ प्रमुख लम्सालले भने , ‘ २५ जना भन्दा बढीको भेला भएपनि दुरी कायम गरेर कार्यक्रम संचालन गरिएको गरिएको हो । ’
सरकारले २५ जनाभन्दाबढी मानिस भेला हुन समेत रोक लगाएको छ । पार्टी प्यालेस, मठमन्दिर, गुम्बा, मस्जिद, चर्च जस्ता धार्मिक र सार्वजनिक स्थलहरुमा २५ जना भन्दा बढी मानिसहरु भेला हुन हुन पाउने छैनन् । संक्रामक रोग ऐन, २०२० अनुसार नियम उल्लंघन गरे ६ महिनासम्म कैद हुन सक्छ । ऐनअनुसारको आदेशको अपहेलना गर्ने व्यक्तिलाई एक महिनासम्म कैद र सय रुपैयाँसम्म जरिवाना तथा ऐनअनुसारका अधिकृत व्यक्तिहरूलाई बाधा पु¥याउनेलाई ६ महिनासम्म कैद र ६ सयसम्म जरिवाना वा दुवै सजाय हुन सक्ने प्रावधान छ ।

मन्त्री पुनले कोरोना रोकथामको प्रयासलाई प्रभावकारी र सफल बनाउन प्रदेश सरकारले स्रोत, साधन र शक्तिको उच्चतम परिचालन गरेको बताइन् । स्वास्थ्यकर्मीहरु र चिकित्सकहरुलाई उच्च मनोबलका साथ काम गर्न आग्रह गर्दै मन्त्री पुनले उपचार र रोकथामका लागि आवश्यक पर्ने सामग्री, औषधी र उपकरणको अभाव हुन नदिने बताइन् ।

बजारमा पर्याप्त सामान नभएको अवस्थामा विद्यमान खरिद ऐन अनुसार सामग्री जुटाउन समस्या परेको उनले बताइन् । खरिद प्रक्रियासंगै सामाजिक संघ संस्था र व्यक्तिहरुबाट सहयोग जुटाएर भएपनि व्यवस्थापन गरिएको मन्त्री पुनले जानकारी दिइन् । सामाजिक दुरी कायम गर्नु र बन्दाबन्दीको पालना गर्नुनै कोरोनाबाट बच्ने अचुक औषधी भएको मन्त्री पुनको भनाई थियो । पश्चिमाञ्चल क्षेत्रीय स्वास्थ्य निर्देशनालय पोखराका माइक्रोबायोलोजिष्ट धर्मराज भट्टले अनावश्यक काममा पिपिईको प्रयोग नगर्न आग्रह गरिन् ।

प्रमुख जिल्ला अधिकारी ज्ञाननाथ ढकालले विदेशबाट आएका र शंकास्पद व्यक्तीको द्रुत परिक्षण गर्दा कोरोना संक्रमण नभएको पुष्टि भएको जानकारी गराए । प्रजिअ ढकालले सम्भावित जोखिमलाई आँकलन गरेर जिल्लाभर १७५ शैया क्षमताको क्वारेन्टाइन बनाइएको जानकारी दिए । उनका अनुसार बेनीमा २० शैया क्षमताको आइसोलेशन वार्ड स्थापना गर्न लागिएको छ । यसअघि बेनी अस्पतालमा ६ शैयाको आइसोलेशन स्थापना गरिएको थियो ।

साधन राम्जाली/आदर्श समाज राष्ट्रिय दैनिक

तपाईको प्रतिक्रिया

सम्बन्धित समाचार