४२ किलोवाट क्षमताको दरखोला दोस्रो लघुजलविद्युत परियोजना उद्घाटन

लुलाङ, आइतबार कात्तिक ३ गते । धवलागिरी गाउँपालिका–२ लुलाङमा निर्माण भएको ४२ किलोवाट क्षमताको दरखोला दोस्रो लघुजलविद्युत परियोजनाको आइतबार उद्घाटन गरिएको छ ।


बैकल्पिक उर्जा प्रर्वद्धन केन्द्रको ८५ लाख, गाउँपालिकाको पचास लाख र स्थानीयबासीको बीस लाख रुपैयाँ बराबरको श्रमदानमा निर्माण भएको परियोजनाबाट ३६५ घरधुरी लाभान्वित भएका उपभोक्ता समितिका सचिव लालबहादुर खड्काथोकीले बताउनुभयो ।

परियोजना उद्घाटन गर्नुहुदै प्रतिनिधिसभा सदस्य भुपेन्द्रबहादुर थापाले आगामी दुई वर्षभित्र लुलाङमा केन्द्रीय प्रशारण लाइनको समेत विस्तार हुने बताउनुभयो । लुलाङ हुदै जलजला जोड्ने सडकलाई संघीय सरकारबाट यस वर्ष एक करोड र गुर्जा जोड्ने सडकलाई प्रदेश सरकारबाट डेढ करोड रुपैयाँ बिनियोजन भएको बताउनुभयो ।

गाउँपालिकाको केन्द्र जोड्ने सडकलाई पक्की बनाउने सरकारको योजना रहेको जानकारी गराउनुहुदै लमसुङ माविमा चार कोठे र लुलाङ आधारभूत विद्यालयमा दुई कोठे भवन निर्माणका लागि बजेट बिनियोजन भएको बताउनुभयो ।गाउँपालिकाका अध्यक्ष थमसरा पुनले लघुजलविद्युतको प्रयोग गरेर आयआर्जन र उत्पादनमुलक उद्यम व्यवसाय सञ्चालन गरेर आत्मनिर्भर बन्न सुझाव दिनुभयो । लुलाङमा बालबिवाह न्युनीकरण र सरसफाई कायममा जोड दिनुपर्ने बताउनुभयो ।

परियोजनामा प्रयोग भएका काठका पोल विस्थापित गराएर फलामका राख्ने बताउनुभयो । प्रमुख प्रशासकीय अधिकृत गोविन्द सुनारले यो परियोजना गाउँपालिकाको गौरवको आयोजना भएको बताउँदै यसको दिगो प्रयोग, सुरक्षा र संरक्षणमा ध्यान दिनुपर्ने बताउनुभयो ।

वडा अध्यक्ष गमप्रसाद बिक, सदस्य केशरबहादुर पुर्जा, नेकपाका बलबहादुर बिक र नेपाली काँग्रेसका ज्ञानबहादुर पाइजाले २०७२ मा जुगेपानीमा आएको पहिरोले विद्युतगृह र नहर बगाएपछि बन्द भएको परियोजना पुननिर्माण भएपछि लुलाङबासीलाई राहत मिलेको बताउनुभयो ।

कार्यक्रममा हेलीकप्टरबाट परियोजनाको जेनेरेटर र टरर्वाइन ढुवानका लागि सहयोग गर्ने काठमाडौका कलीराम पुर्जालाई सम्मान गरिएको थियो । यसैगरी श्रीमानले दोस्रो बिवाह गरेपछि अलपत्र परेका सुकमाया बिकका छ जना छोरीहरुको पठनपाठनका लागि मोना बहराइनका दितृय उपाध्यक्ष भक्तबहादुर सिङ्कीजाको पहलमा संकलित ३१ ह्जार २५० रुपैयाँ हस्तान्तरण गरिएको थियो ।

नर्जाखोला युवा क्लवका अध्यक्ष सविन घर्तीको सञ्चालन, वडा अध्यक्ष गमप्रसाद बिकको अध्यक्षता र उपभोक्ता समितिका सचिव लालबहादुर खड्काथोकीको स्वागत मन्तब्यमा कार्यक्रम सम्पन्न भएको थियो । इलाका प्रहरी कार्यालय दरवाङका प्रहरी निरिक्षक रामप्रसाद पाण्डेले बालबिवाह र बहुबिवाह बिरुद्धको कानुनी ब्यवस्थाको बारेमा जानकारी गराउनुभएको थियो ।

खबाङको दोभानमा बाँध बनाइएको छ । ७२५ मिटर लामो पाइपलाइन मार्फत ल्याइएको पानीलाई ६२ मिटर अग्लो हेडबाट विद्युतगृहमा खसालेर बिजुली उत्पादन गरिएको छ । ८६ मिटर फलामे र ६६३ मिटर प्लाष्टिक पाइप जडान भएको छ ।

सम्बन्धित समाचार

thumbnail

धवलागिरी गाउँपालिकाको ४० करोड ४९ लाख ४९ हजार रुपैयाँ बजेट पारित

म्याग्दी । म्याग्दीको धवलागिरी गाउँपालिकामा कुल  ४० करोड ४९ लाख ४९ हजार रुपैयाँको बजेट पारित भएको छ । गाउँपालिकाको केन्द्र मुनामा सम्पन्न १६ औँ गाउँ सभामा अध्यक्ष प्रेमप्रसाद पुनले प्रस्तुत गर्नुभएको आगामी…

thumbnail

दुर्गम खाम्लामा सडक पुग्यो

म्याग्दी । म्याग्दीको दुर्गम धवलागिरि गाउँपालिका –४, स्थित खाम्लामा सडक पुगेको छ । यस क्षेत्रमा निर्माण हुने तीनवटा जलविद्युत आयोजनाले संयुक्त रुपमा मालिका गाउँपालिका –७, खारादेखि खाम्लासम्म १० किलो मिटर सडकको ट्रयाक…

thumbnail

धवलागिरी गाउँपालिकामा आइतबार बिदा नहुने

बेनी ।म्याग्दीको धवलागिरी गाउँपालिकाले आईतबार सार्वजनिक विदा नदिने भएको छ ।मुनामा गाउँपालिका अध्यक्ष प्रेमप्रसाद पुनको अध्यक्षतामा सोमबार बसेको कार्यपालिकाको पहिलो बैठकलले गाउँपालिकाकाको कार्यालय, वडा कार्यालय र विद्यालय शनिबार बाहेक आईतबार देखि शुक्रबारसम्म…