लमजुङ, धनुषा र नवलपरासीबाट २३ जुवाडे पक्राउ

काठमाडौं । लमजुङ, धनुषा र नवलपरासी पूर्वबाट २३ जुवाडे पक्राउ परेका छन्। चाडवाडको समयमा जुवा तथा तास खेलिरहेका बेला उनीहरूलाई पक्राउ गरिएको प्रहरीले जनाएको छ।

लमजुङस्थित मध्यनेपाल नगरपालिका-१ सरेदीस्थित कृषि फर्ममा तास खेलिरहेको अवस्थामा सुन्दरबजार नगरपालिका-९ का ५० वर्षीय रामबहादुर गुरुङलगायत १३ जना जुवाडे पक्राउ परेका छन। मंगलबार दिउँसो उनीहरूलाई ११ लाख ४७ हजार ८ सय ४२ रुपैयाँ, ३ गड्डी तास र ३ सय १५ पत्ती खुल्ला ताससहित पक्राउ गरिएको प्रहरीले जनाएको छ।

उक्त फर्ममा तास खेलिरहेको भन्ने सूचनाका आधारमा जिल्ला प्रहरी कार्यालय लमजुङबाट खटिएको प्रहरीले उनीहरूलाई नगदसहित फेला पारेको हो। धनुषा, जनकपुर उपमहानगरपालिका-२ का बेचु ठाकुरको घरमा तास खेलिरहको अवस्थामा सोही उपमहानगरपालिका-११ का ५ वर्षीय सुशील साहलगायत दुई जना पक्राउ परेका छन्। १ लाख ४५ हजार ४ सय ३० रुपैयाँ र १० बुक ताससहित उनीहरूलाई पक्राउ गरिएको जिल्ला प्रहरी कार्यालय धनुषाले जनाएको छ।

नवलपरासीपूर्व, कावासोती नगरपालिका-१५ का मीनराज महत्तोको घरमा तास खेलिरहेको अवस्थामा देवचुली नगरपालिका-११ का ३६ वर्षीय लीलाबहादुर रानालगायत ८ जना पक्राउ परेका छन्। नगद १ लाख ८६ हजार ९ सय ५ रुपैयाँ, १२ हजार रुपैयाँ लेखिएको १ थान चेक, १ सय ३० भारतीय रुपैयाँ र तीन बुक ताससहित बुधबार बिहान प्रहरीले उनीहरूलाई पक्राउ गरेको हो। जिल्ला प्रहरी कार्यालय र प्रहरी चौकी कोल्हुवाबाट खटिएको प्रहरीले उनीहरूलाई पक्राउ गरिएको प्रहरीले जनाएको छ। पक्राउ परेकाहरूलाई जुवा ऐन अन्तर्गत कारबाही थालिएको छ। सेतोपाटीबाट साभार

तपाईको प्रतिक्रिया

सम्बन्धित समाचार