काठमाडौँ । प्रधानमन्त्री शेरबहादुर देउवाले आर्थिक पुनःरुत्थानलाई तीव्रताका साथ अघि बनाउन सरकार प्रतिबद्ध रहेको बताउनुभएको छ । बुधबार काठमाडौँमा नेपाल आर्थिक पत्रकार समाज (सेजन) को रजत जयन्ती तथा सेजन अवार्ड वितरण समारोहलाई सम्बोधन गर्दै प्रधानमन्त्री देउवाले कोभिड–१९ को महामारी नसकिए पनि सामान्य अवस्थातिर फर्किएको भन्दै मुलुकमा लगानीको वातावरण बनाइने समेत बताउनभयो ।
छोटो समयमा मुलुकको विकास गर्नुपर्ने भन्दै उहाँले सरकार अनावश्यक नियन्त्रणको पक्षमा नरहेको र आवश्यक नियमनको सहजीकरणको पक्षमा रहेको धारणा राख्नुभयो । प्रधानमन्त्री देउवाले मुलुकमा आर्थिक सुधार गरिएका केही निजी लगानी वृद्धि भएको भन्दै बैंक तथा वित्तीय संस्था, वायुसेवा कम्पनी, जलविद्युतमा भएको कामको प्रसंशा गर्नुभयो ।
कार्यक्रममा अर्थमन्त्री जनार्दन शर्माले अहिलेको खर्च प्रणालीले भनेअनुसार लक्ष्य प्राप्त नभइरहेकाले नयाँ विधि अबलम्बन गर्नुपर्नेमा जोड दिनुभयो । नयाँ प्रणाली ल्याउने बारे पनि छलफल भइरहेको उनले जानकारी दिनुभयो । उहाँले विकासका सानाति कामहरूमा पनि अदालतको ‘स्टे अर्डर’ ले विकासमा ढिलाइ हुने गरेको बताउँदै विकासका लागि विशेष कानुनको चाहिने बताउनुभयो । नागरिक खबरबाट
