काठमाडौं । नेपाली काँग्रेसका नेता प्रकाशमान सिंहले आसन्न स्थानीय तहको निर्वाचनमा चुनावी तालमेलका लागि पार्टीले सातवटै तहका कार्यसमितिको सल्लाहअनुसार निर्णय लिने बताउनुभएको छ । काभ्रेको धुलिखेलमा बिहीबार आयोजित पत्रकार सम्मेलनमा उनले चुनावी तालमेलका बारेमा निर्णय गर्नका लागि सबै तहका कार्यसमितिहरूसँग राय लिइने बताउनुभएको छ ।
‘नेपाली काँग्रेस डेमोक्रेटिक पार्टी भएकोले केन्द्रीय कार्यसमिति, सातै वटा प्रदेश कार्यसमिति, ७७ जिल्ला कार्यसमिति, १६५ संघीय निर्वाचन क्षेत्र कार्यसमिति, ३ सय ३० प्रदेश निर्वाचन क्षेत्र कार्यसमिति, ७ सय ५३ पालिका कार्यसमिति, ६ हजार ७ सय ४३ वडा कार्यसमितिको भ्यु प्वाइन्ट लिएर पार्टी एउटा डेमोक्रेटिक तवरले एक्सरसाइज गरेर के गर्दा राम्रो हुन्छ,’ नेता सिंहले भन्नुभयो ।
संघीयतालाई संस्थागत गरी विकास निर्माणका कार्य अगाडि बढाउनुपर्ने सिंहले बताउनुभयो । सुशासनलाई सर्वोपरि हितमा राखेर कदम अगाडि बढाउनु पर्ने उहाँको भनाइ छ । उहाँले १४ औँ महाधिवेशनबाट पार्टी नयाँ ऊर्जा उत्पन्न भएको जिकिर गर्दै काँग्रेस एक्लै पनि चुनाव लड्न तयार भएको बताउनुभयो। ‘काँग्रेस भर्खरै महाधिवेशन सम्पन्न भएको छ,’ सिंहले भन्नुभयो, ‘अर्गनाइजेसनमा उर्जा पैदा भएको छ। उर्जाअनुसार काँग्रेस एक्लै लड्नलाई पनि तयार छ।’
प्रतिगमन रोक्न पाँच दलीय गठबन्धन बनेको र गठबन्धन सरकारले संविधानको भावना र मर्मअनुरुप सरकारले स्थानीय तहको निर्वाचन मिति तोकेको पनि बताउनुभयो। गठबन्धन सरकार प्रतिगमन रोक्नका लागि बनेको सरकार हो। संविधानलाई ट्रयाकमा राख्ने, संविधानको भावना र मर्मअनुरुप सरकारले स्थानीय तहको निर्वाचन मिति तोकेको छ,’ सिंहले भन्नुभयो, ‘त्यही अनुसार निर्वाचन आयोगले आफ्नो काम अगाडि बढाएको छ।’ रातोपाटीबाट
