म्याग्दी । म्याग्दीको रघुगंगा गाउँपालिका वडा नम्बर ६ पाखापानीले वडा कार्यालयका सेवाहरू बस्ती–बस्तीबाट सञ्चालन गर्ने घोषणा गरेको छ । नवनिर्वाचित वडा अध्यक्ष मनकुमार शेरपुञ्जा मगरले पदभारग्रहण गदैं बस्तीमा इन्टरनेटको सुविधा विस्तार गरी अनलाइन प्रविधिबाट गरिने प्रशासनिक सेवा दिने बताउनुभयो ।
पदभारग्रहणसँगै बसेको वडा समितिको बैठकले विभिन्न ६ निर्णय समेत गरेको छ । वडाबाट ज्येष्ठ नागरिकलाई स्वास्थ्य सेवामा सहज हुने गरी मासिक रुपमा स्वास्थ्य चौकीसँग समन्वय गरी टोलमा पुगेर सेवा दिने, टोल विकास समिति गठन, हरेक विद्यालयमा रहेको बाल विकास केन्द्रको स्थापना तथा भएकालाई नियमित सहयोग गरिने अध्यक्ष शेरपुञ्जा मगरले बताउनुभयो ।
दोस्रो कार्यकालका लागि निर्वाचित हुनुभएका शेरपुञ्जाले अब अघिल्लो कार्यकालयमा अपुरा रहेका योजनाहरु सहित हरेक घरधुरीमा सेवा पुग्ने गरी काम गर्ने वडा समितिको पहिलो बैठकले समेत निर्णय गरेको छ । वडाभित्रका अति विकट बस्तीहरुमा रहेको समस्या समाधान सहित आवश्यकता अनुसार घुम्ती शिक्षा, स्वास्थ्य लगायतका अभियानलाई समेत तिव्रता दिने जनाइएको छ । पाखापानीको वडा अध्यक्षमा मनकुमार शेरपुञ्जा दोस्रो कार्यकालको लागि निर्वाचित हुनुभएको थियो ।
