सुर्खेत । निर्वाचन सुरक्षा खटिएका एक प्रहरीले मतदान अधिकृत, म्यादी प्रहरी र गाउँलेलाई कुटपिट गरेका छन्। पश्चिम सुर्खेतको पञ्चपुरी नगरपालिका–७ धनबोटस्थित नेपाल राष्ट्रिय आवासीय विद्यालयको मतदान केन्द्रमा खटिएका नेपाल प्रहरीका वरिष्ठ सई नरेन्द्रप्रसाद भट्टले मतदान अधिकृत निरज झा, सहायक मतदान अधिकृत राजेन्द्र धमालासहित म्यादी प्रहरी र गाउँलेलाई कुटपिट गरेका हुन्।
भट्टको कुटाइबाट मतदान अधिकृतसहित केही म्यादी र स्थानीय सामान्य घाइते भएका छन्। मतदान अधिकृत झाका अनुसार बुधबार राति ११ बजेदेखि बिहान ६ बजेसम्म भट्टले आफूसहित सहायक मतदान अधिकृत, म्यादी प्रहरी र गाउँलेलाई कुटपिट गरेको बताए। ‘मदिरा सेवन गरेर सुरुमा मतदानस्थल नजिकैको गाउँमा गएर गाउँलेलाई कुटपिट गरेछन्,’ झाले भने, ‘त्यहाँबाट प्रहरीले उद्दार गरेर हामी सुतिरहेको घरमा ल्याएपछि हामीमाथिनै कुटपिट भयो।’
मदिरा सेवन गरेका वरिष्ठ सई भट्ट बुधबार राति ११ बजेतिर धनबोट गाउँ पसेका थिए। त्यहाँ चार जना स्थानीयको घरभित्र पसेर हतियार देखाउँदै उनले कुटपिट गरेका थिए। ‘राति गाउँले जम्मा भएर त्यहाँबाट उनलाई लखेटेछन्,’ मतदान अधिकृत झाले भने, ‘त्यसपछि प्रहरी र म्यादी प्रहरीले उनको उद्दार गरेर हामी सुतिरहेको घरमा ल्याएका रहेछन्।’
मतदान अधिकृतसहित निर्वाचन सम्पन्न गराउन गएको टोली सुतेको घरमा पुगेपछि उनले सुरुमा मतदान अधिकृत र सहायक मतदान अधिकृतमाथि हातपात गरेका थिए। ‘हतियार पहिलेनै उनकै सहकर्मी प्रहरीले खोसेकाले ठूलो घटना हुन् पाएन्,’ उनले भने, ‘नभए गोली हानेर धेरैको ज्यान लिन सक्थे।’
मतदान अधिकृतसहितलाई हातपात गरेर घर बाहिर आएका भट्टले सुरक्षामा खटिएका प्रहरी र म्यादीमाथि पनि हातपात गरेका थिए। ‘विहान ६ बजेतिर इलाका प्रहरी कार्यालय बावियाचौरबाट थप प्रहरी र सशस्त्र प्रहरीको बल आएपछि उनलाई नियन्त्रणमा लिएर गयो,’ मतदान अधिकृत झाले भने, ‘यस्तो असुरक्षामा कसरी मतदान भयरहित वातावरणमा सम्पन्न गर्ने हो रु’
कर्णाली प्रदेश प्रहरी कार्यालयका निमित्त प्रदेश प्रहरी प्रमुख राजेशनाथ बास्तोलाले मदिरा सेवन गरेर मतदान अधिकृत, म्यादी प्रहरी र गाउँलेलाई कुटपिट गर्ने वरिष्ठ सई भट्टलाई नियन्त्रणमा लिएर कारवाही प्रक्रिया सुरु गरिएको बताए। ‘भट्टलाई कारवाहीका लागि पक्राउ गरेर वीरेन्द्रनगर ल्याएका छौं, विभागीय कारवाही गछौं,’ उनले भने, ‘मतदानस्थलमा थप जिल्लाबाट थप टोली पठाएका छौं।’ मतदान अधिकृतसहितलाई कुटपिट गर्ने भट्ट सशस्त्र प्रहरी गण वीरेन्द्रनगरमा सहायक लेखा अधिकृत हुन्। nagariknews.nagariknetworkबाट
