सुर्खेत । सल्यानको कपुरकोट गाउँपालिकामा आगलागी हुँदा २ घर जलेर नष्ट भएका छन्। कपुरकोट गाउँपालिका-२ दाङ्बाङ गाउँमा शुक्रबार बिहान आगलागी भएको हो।
आगलागीबाट दुई घर पूर्ण रूपमा नष्ट भएका छन् भने एउटा घरमा आंशिक क्षति भएको छ। जिल्ला प्रहरी कार्यालय सल्यानका अनुसार बिहान ८ बजेतिर आगलागी भएको हो।
प्रहरी र स्थानीयको सहयोगमा साढे १२ बजे आगो नियन्त्रणमा आएको हो। प्रहरीका अनुसार उक्त गाउँका सुकबहादुर बुढा र चित्र बहादुर घर्तीको घर पूर्ण रूपमा जलेका छन् भने खड्क घर्तीको घरमा आंशिक क्षति भएको छ।
पूर्ण रूपमा नष्ट भएका घरहरूमध्ये एउटा घरमा १५ हजार रुपैयाँ नगद र अर्को घरमा साढे २ लाख रुपैयाँ नगद जलेर नष्ट भएको प्रारम्भिक विवरण आएको छ।
अरु अन्नबाली, लत्ताकपडा पनि जलेका छन्। मानवीय तथा पशुचौपायाको कुनै क्षति नभएको सल्यान प्रहरीले जनाएको छ। आगलागीको कारणबारे भने जानकारी आइनसकेको जिल्ला प्रहरी कार्यालयले जनाएको छ । सेतोपाटीबाट
