दाङ । दाङको तुलसीपुरमा स्कूल बस दुर्घटना हुँदा दुई जनाको मृत्यु भएको छ । आज बिहानै भएको दुर्घटनामा परी तुलसीपुर वडा १६ का अस्मिता बस्नेत र किरण चौधरीको निधन भएको इलाका प्रहरी कार्यालय तुलसीपुरले जनाएको छ ।
बस्नेतको घटनास्थलमै मृत्यु भएको र चौधरीको राप्ती प्रादेशिक अस्पतालमा उपचारको क्रममा निधन भएको इलाका प्रहरी कार्यालय तुलसीपुरका प्रहरी निरीक्षक झलक शर्माले जानकारी दिए।
इलाका प्रहरी कार्यालय तुलसीपुरले जनाए अनुसार तुलसीपुरस्थित ज्ञानज्योति सेकेन्डरी स्कूलको रा १ क ४३३ नंको बस तुलसीपुर उपमहानगरपालिका–१५ को सरैयाडाँडा चोकमा दुर्घटना भएको हो ।
दुर्घटनामा परी १५ जना विद्यार्थी घाइते भएका छन् । घाइतेमध्ये गम्भीर अवस्थाका पाँच जनालाई थप उपचारका लागि कोहलपुरस्थित शिक्षण अस्पताल पठाइएको छ ।
अन्य घाइतेको राप्ती प्रादेशिक अस्पताल तुलसीपुरमा उपचार भइरहेको छ । तुलसीपुर उपमहानगरपालिका–१५ कोठेरीबाट तुलसीपुरतर्फ आउँदै गरेको बस आज विहान ५ बजेतिर एक्कासि ब्रेक फेल भएर दुर्घटना भएको बताइएको छ । नागरिक खबरबाट
