रुपन्देही । सिद्धार्थ राजमार्गको बुटवल–पाल्पा सडकखण्ड अन्तर्गत तिनाउ गाउँपालिका वडा नम्बर ५ चरचरे कालिमाटीमा आज बिहान टिप्पर दुर्घटनामा परेका छ । चुनढुङ्गा बोकेर बुटवलतर्फ जाँदै गरेको लु २ ख ८२० नम्बरको टिप्पर दुर्घटनामा परेको हो । टिपर सडकबाट करिब एक सय ५० मिटर तल तिनाउ नदीमा खसेको छ ।
लुम्बिनी प्रदेश ट्राफिक प्रहरी कार्यालयका सूचना अधिकारी प्रहरी नायब उपरीक्षक डिल्लीनारायण पाण्डेका अनुसार दुर्घटनामा टिप्पर चालक पाल्पाको पूर्वखोला गाउँपालिका वडा नम्बर ५ विरकोट घर भएका ३६ वर्षीय सुदीप गैरेको मृत्यु भएको छ ।
गैरेलाई लुम्बिनी मेडिकल कलेज प्रभासमा उपचारका लागि लगिएको थियो । टिप्पर तिनाउ नदीमा खसेर डुबेको अवस्थामा भेटिएकाले सहचालक वा अरू कोही उक्त टिप्परमा भए नभएकोबारे खोजी भइरहेको प्रहरीले जनाएको छ । नागरिक खबरबाट
