म्याग्दी। म्याग्दी सदरमुकाम बेनीमा शनिबार रातिदेखि दुई युवा सम्पर्कविहिन हुनुभएको छ । जिल्लाको रघुगंगा गाउँपालिका– २,भगवतीका ३६ वर्षीय एक कुमार रिजाल र बेनी नगरपालिका–६,जामुनाखर्कका २५ वर्षिय हरिप्रसाद शर्मा (रिजाल) शनिवार राती करिब ११ बजेदेखि सम्पर्क विहिन हुनुभएको हो । सम्पर्कविहिन हुनुभएका दुवैजनाको अवस्था अझै अज्ञात रहेको छ ।शिक्षा विकास तथा समन्वय इकाई म्याग्दीमा सहयोगी कर्मचारीको रुपमा कार्यरत एक कुमार र बेनीको एक स्टोर्ष पसलमा लेखाको हिसाबकिताबको काम गर्ने हरि नाताले उहाँहरू दाजुभाइ पर्नुहुन्छ ।
दुबै जनाले बेनी स्थित एक होटलमा खाना खाएपछि बाइक चढेर निस्कीएको पत्ता लागेपनि त्यसलगत्तै उहाँहरू आफ्नो कोठामा नपुगेको र मोवाइल फोन समेत एकैसाथ स्विच अफ भएपछि आफन्तले आइतबार खोजविनका लागि प्रहरीमा निवेदन दिनुभएको थियो ।
सम्पर्कविहिन भएको समयमा सम्भावित ठाउँका सिसिटिभी क्यामेराले देखाएको दृष्यको आधारमा रिजालद्धय चढेको मोटरसाइकल म्याग्दी र कालीगण्डकी नदी किनारमा निर्माण चक्रपथ (रिङरोड) तर्फ मोडिएको देखिएको र उक्त मोटरसाइकल सो समयमा कालीपुलमा पुगेको नदेखिएपछि कालीगण्डकी नदीमा दुर्घटनामा परेको हुनसक्ने अनुमानको आधारमा खोजी थालिएको प्रहरीले जनाएको छ ।
‘‘शनिबार राति १०ः५५ बजेको समयमा बेनी स्थित एक होटलमा खाना खाएर मोटरसाइकल चढेर निस्किएको सिसिटिभी क्यामेरामा देखिन्छ । दुई युवा चढेको मोटरसाइकल म्याग्दी र कालीगण्डकी नदी किनारमा निर्मित चक्रपथतर्फ मोडिएको सिसी क्यामेराले देखाएको छ । लगत्तै १०ः ५८ को समयमा मोवाइल फोन समेत स्विच अफ भएको छ ,’’ जिल्ला प्रहरी कार्यालय म्याग्दीका सूचना अधिकारी प्रहरी निरिक्षक सागर पौडेलले भन्नुभयो।
रिजालद्धयको अन्य माध्ययमबाट खोजतलास गर्दा अवस्था पत्ता लाग्न नसकेपछि उहाँहरु सम्पर्क विहिन भएको समयमा अविरल बर्षा भएको र बाइकको गति तीब्र भएकाले नियन्त्रण गुमाउँदा दुर्घटनामा परेर कालीगण्डकी नदीतर्फ खसेको अनुमानको आधारमा सोमबारदेखि कालीगण्डकी नदी किनारमा खोजी सुरु गरिएको छ ।मोटरसाइकल गुडेको सम्भावित ठाउँमा सिसी क्यामेराको पहुँच नभएको र रातको समयमा प्रत्यक्षदर्शी समेत नभएको हुँदा सम्पर्कविहिन हुनुभएका दुबै जनाको अवस्थाबारे एकिन गर्न कठिनाइ भएको प्रहरीले जनाएको छ ।
सोमबार दिनभर नेपाल प्रहरी, शसस्त्र प्रहरी र वेपत्ता युवाहरुको आफन्तहरुको टोलीले नदीको किनारमा खोजी गरेपनि दुई युवासंगै उहाँहरु सवार रहेको मोटरसाइकलको अवस्था पत्ता लाग्न सकेको छैन। रिजालद्धयको आफन्तले कुनै कारणबस मोवाइल फोन अफ गरेर बसेको भए छिटो सम्पर्कमा आउन अनुरोध गरेका छन भने दुर्घटनाको भवितव्यमा परेको हुनसक्ने भएकाले कालीगण्डकी नदीमा खोजी कार्यलाई निरन्तरता दिन आग्रह गर्नुभएको छ ।
