बेनी । म्याग्दीको धवलागिरी गाउँपालिका–७,सिवाङ झिनडाँडाकी पुनमाया बिकको हत्या अभियोगमा श्रीमान ३२ वर्षिय प्रेम भनिने रमेश कामीलाई जिल्ला प्रहरी कार्यालय म्याग्दीले पक्राउ गरेको छ ।
घरबाहिर शौचालय गएको मौका छोपी हत्या गरी भागेका रमेशलाई जिल्ला प्रहरी कार्यालय म्याग्दीको टोलीले गण्डकी प्रदेश कार्यालयबाट समन्वय गरी प्रहरी चौकी बैदानमबाट खटिएको टोलीले पोखरा महानगरपालिका- ७ ,ठूलोखोला घर भई सृजनाचोक बस्ने रमेशलाई माघ ४ गते राती ९ बजे पक्राउ गरिएको प्रहरी नायव उपरीक्षक सुर्यबहादुर थापाले बताउनुभयो ।हत्यामा संलग्न अभियुक्तलाई जिल्ला अदालत म्याग्दीबाट ५ दिनको म्याद थप गरी कर्तब्य ज्यान मुद्धामा अनुसन्धान भइरहेको छ ।
दम्पती बीचमा प्रेममा खटपट र सम्बन्धमा अविश्वासका कारण हत्या भएको खुलेको छ । तीन वर्ष अगाडी प्रेम विवाह गरेकी विक र श्रीमान रमेश कामीको सम्बन्धका कारण माघ ३ गते राती ११ बजे घटना घटेको अनुसन्धानबाट खुलेको छ । दुबै बिच केही बिषयमा बिवाद बढे पछि पुनमायाँले बेवास्ता गरी माइतीमा बसेकी थिइन् ।
सन्की स्वभावका कारण दैनिकजसो पिटाइ खानुपरेपछि परिवारका सदस्यको साहरामा गएकी पुनमायालाई हत्याको योजना बनाएर घरसम्म पुगेका रमेशले हत्या गरी राती नै पोखरा भागेको सूचना अधिकारी सागर तिमिल्सिनाले बताउनुभयो । घरमाथि बसेर पुनमायाँको हत्याको योजना बनाएको भेटिएको छ ।
