काठमाडौँ । नेपाली कांग्रेसले आगामी चुनावमा अन्य दलसँग गठबन्धन गर्ने कि नगर्ने भन्ने निर्णय मंगलबार गर्दै छ । दिउँसो ३ बजे सानेपास्थित पार्टी केन्द्रीय कार्यालयमा बस्ने केन्द्रीय समिति बैठकमा पार्टीको चुनावी तालमेलको रणनीतिबारे निर्णय सार्वजनिक गर्न लागेको पार्टी प्रवक्ता डा.प्रकाशशरण महतले जानकारी दिनुभयो।
स्थानीय तहको निर्वाचनमा कसरी प्रस्तुत हुने भन्नेबारे निर्णय सार्वजनिक हुने उहाँको भनाइ छ । गत शुक्रबारदेखि बसेको पार्टीको केन्द्रीय समिति बैठकमा चुनावी गठबन्धनबारे छलफल भएको छ । बैठकमा स्थानीय तहको चुनावमा सत्ता गठबन्धनका दलहरूबीच आवश्यकताको आधारमा चुनावी तालमेल गर्ने पक्षमा धेरै मत देखिएको छ ।
पार्टी सभापति एवं प्रधानमन्त्री शेरबहादुर देउवा पनि गठबन्धनको पक्षमा उभिनुभएको छ । त्यसले गर्दा आवश्यकताको सिद्धान्तको आधारमा चुनावी तालमेलको निर्णय हुन सक्ने नेताहरूले बताउनुभएको छ । पार्टीले आधिकारिक निर्णय सार्वजनिक गर्न बाँकी रहे पनि पार्टी सभापति, अन्य पदाधिकारी, शीर्ष नेतादेखि केन्द्रीय सदस्यसम्मले आ–आफ्नो धारणा व्यक्त गर्नुभएको छ ।
पार्टी सभापति देउवा, नेता रामचन्द्र पौडेल, पार्टीका प्रवक्ता डा.महतलगायत गठबन्धनको पक्षमा छन् । महामन्त्री विश्वप्रकाश शर्माले पनि कतै एक्लै त कतै आवश्यकताको आधारमा अन्य दलसँग चुनावी तालमेल गर्ने बताउनुभएको छ । शीर्ष नेतादेखि, पदाधिकारी र अधिकांश केन्द्रीय सदस्य सभापति देउवा पक्षको लाइनमा उभिएका बेला नेता शेखर कोइरालाले भने एक्लै चुनाव लड्नुपर्ने अडान कायमै राख्नुभएको छ ।
कोइराला आफ्नो सुरुदेखिकै अडानबाट पछि नहट्दा पार्टीको १४औँ महाधिवेशनमा उहाँकै समूहबाट महामन्त्री बनेका गगन थापाले भने पार्टीको निर्णयविरुद्ध मत प्रकट नगर्ने बताउनुभएको छ । चुनाव एक्लै लड्नुपर्ने कोइरालाको प्रस्तावलाई आफ्नै समूहका नेताले समेत साथ नदिएको देखिएको छ । मंगलबारको बैठकमा यही विषयमा छलफल गरेर निर्णय लिने तयारी छ ।
राजनीतिक विश्लेषक पुरञ्जन आचार्यले सभापति देउवाले शेखर कोइराला समूहलाई पनि मिलाएर लैजाने गरी बीचको बाटो रोज्नुपर्ने बताउनुभयो । उहाँले न्युज कारखानासँग कुरा गर्दै भन्नुभयो, ‘देउवाले नेता शेखर कोइराला, दुई महामन्त्रीहरू गगन थापा र विश्वप्रकाश शर्मा, दुई उपसभापति धनराज गुरुङ र पूर्णबहादुर खड्कादेखि स्थानीय कार्यकर्तासम्मलाई सम्बोधन गर्दै मिलाएर लैजान सक्नुपर्छ ।’ स्थानीय नेता कार्यकर्ता पनि सबैजना गठबन्धनको पक्षमा नभएको भन्दै सवैको भावनाअनुरूप चुनावमा होमिनुपर्ने आचार्यको तर्क छ ।
यसअघि पार्टीमा देउवाले पेलेरै निर्णय गर्दै आएकाले यसपटक पनि कोइरालाको प्रस्तावलाई बेवास्ता गर्दै स्थानीय तहमा आवश्यकताको आधारमा चुनावी तालमेल गर्न सक्ने सम्भावना छ । चुनावी गठबन्धनका लागि संयन्त्र बनाउने तयारीसमेत भएको छ । देउवाले गठबन्धनमा जोड दिए पनि अलग्गै संयन्त्र निर्णय गरेर जानेबारे शीर्ष नेताबारे छलफल भएको हो ।
आजको केन्द्रीय समिति बैठकले आगामी चुनावमा उम्मेदवारहरूलाई टिकट वितरण गर्ने संसदीय समितिको पनि टुंगो लगाउने छ । संसदीय समिति २५ सदस्यीय हुने विधानमा व्यवस्था छ । संसदीय समितिलाई प्रदेश र प्रतिनिधिसभा सदस्यको टिकट वितरणको अधिकार हुन्छ । महानगरका प्रमुख र उपप्रमुखलाई भने केन्द्रीय समितिले टिकट वितरण गर्छ । नागरिक खबरबाट
