बेनी । उत्तरी म्याग्दीको अन्नपुर्ण गाउँपालिका –२ भुरुङ्ग तातोपानी स्थित नागढुङ्गा पहिरोमा परेर एक जनाको मृत्यु भएको छ । माथिबाट खसेको पहिरोमा परेर सोही गाउँपालिका– ३, काभे्रका ३२ बर्षिय झलक पुनको मृत्यु भएको जिल्ला प्रहरी कार्यालय, म्याग्दीले जनाएको छ ।

असार २० मा कुवेतबाट आएर बेनी स्थित म्याग्दी बहुमुखी क्वाम्पसको क्वारेन्टाईनमा बसेर घर जाने क्रममा पुुनको पहिरोमा परेर मृत्यु भएको जिल्ला प्रहरी कार्यालय म्याग्दीका प्रहरी नायव उपरिक्षक किरण जङ्ग कुँवरले जानकारी दिनुभयो । उहाँका अनुसार पुनसंगै साथमा गएका अन्नपुर्ण–४, नारच्याङका २७ बर्षिय अनिल गर्वुजा घाईते भएका छन् । हिडिरहेको अवस्थामा पहिरोमा परेर घटना स्थलमै पुनको मृत्यु भएको प्रनाउ कुँवरले बताउनुभयो । पीसिआर परिक्षण रिपोर्ट नेगेटिभ आएपछि उनलाई घर पठाइएको थियो ।

१४ दिन क्वारेन्टाइनको बसाई सकेर पुन गर्बुजा संगै सोमबार कालीगण्डकी नदीकोे उच्च वहाबले सडक कटान गरेपछि अन्नपुर्ण होटल भन्दा माथिको खच्चड हिड्ने पैदल मार्ग हुँदै घरतर्फ लागेका थिए । पुनका घरमा बाबा आमा ,दुई छोरा र श्रीमती रहेका अन्नपुर्ण–३का वडा सदस्य हस्तबहादुर पुनले जानकारी दिनुभयो । उहाँका अनुसार पुन कुवेतबाट दुई बर्षपछि मात्र नेपाल आएका हुन् ।

त्यसैगरी सोही गाउँपालिका–३ ,काभ्रे स्थित सोमबार भजेनी खोलामा आएको बाढीमा परेर बेपत्ता ६९ बर्षिय बलबहादुर गर्बुजाको ज्याकेट र पानी बुट भेटिएको वडा सदस्य पुनले जानकारी दिनुभयो ।