बेनी । बाढी र पहिरोबाट प्रभावित भएकाहरुलाई बेनी नगरपालिकाले १० लाख रुपैयाँ राहत वितरण गरेको छ । पूर्ण क्षति,विस्थापित र उच्च जोखिममा परेकाहरुलाई नगरपालिकाले १० लाख ७ हजार रुपैयाँ र ३६ थान पाल वितरण गरेको हो ।बाढी र पहिरोका कारण घर पूर्णरुपमा क्षति भएकालाई ४० हजार, विस्थापितलाई ३० हजार र आशिंक क्षति पुगेकालाई २० हजार रुपैयाँका दरले राहत वितरण गरिने व्यवस्था मिलाइएको नगरपालिकाले जनाएको छ ।

नगरपालिकाका विभिन्न स्थानहरुमा गरेर २० घर पूर्ण क्षति, एकसय ६ घर उच्च जोखिममा,२३ परिवार विस्थापित र १९ घरमा बाढी र पहिरोका कारण आंशिक क्षति पुगेको नगरपालिकाका सूचना अधिकारी युवराज थापाले जानकारी दिनुभयो ।

उहाँले दिएको जानकारी अनुसार वडा नम्बर १ अर्जममा ५ घर उच्च जोखिममा रहेका छन् । एक घर पहिरोका कारण विस्थापित बनेको छ । यसै गरी वडा नम्बर २ मा ४ घर पूर्ण क्षति,१० घर उच्च जोखिम र २ घरमा आशिंक क्षति पुगेको नगरपालिकाले जनाएको छ ।वडा नम्बर ३ मा ११ घर उच्च जोखिम,३ घर पूर्ण क्षति र २ घरपरिवार बाढीपहिरोका कारण विस्थापित बनेका छन् । वडा नम्बर ४ का १८ घर उच्च जोखिममा परेका छन भने १ घरमा पूर्ण क्षति पुगेको छ । ५ नम्बर वडाका ११ घर उच्च जोखिम,१ घर पूर्ण र १ घरमा आशिंक क्षति पुगेको छ । त्यस्तै वडा नम्बर ६ मा ६ घर पूर्ण,१३ घर उच्च जोखिम र ११ घर आंशिक जोखीममा परेका छन् ।

७ नम्बर वडाको मंगलाघाट स्थित प्रहरी चौकीलाई म्याग्दी नदीको कटानका कारण पूर्ण क्षति पुगेको छ भने कुरिला खर्क पहिरोको उच्च जोखिम परेको छ ।
वडा नम्बर ८को खैरेनीमा १ घर पूर्ण क्षति र एकपाटेमा रहेका १३ घर उच्च जोखिममा रहेका छन् । यता ९ नम्बर वडामा ३ घर उच्च र १ घर आंशिक जोखिममा परेका छन् ।

नगरपालिकाको १० नम्बर वडा पात्लेखेतको बन्द्रेको पहिरोका कारण २० घर पूर्ण क्षति, २३ घर विस्थापीत, १०६ घर उच्च जोखिममा र १९ घरमा आंशिक क्षति पुगेको छ ।