आर्थिक मुख्य समाचार म्याग्दी म्याग्दी न्युज विशेष स्थानीय

म्याग्दीमा गत वर्ष कृषि ज्ञान केन्द्रद्वारा सञ्चालित योजना तथा कार्यक्रमहरुको प्रगति विवरण सार्वजनिक

 कुल बजेटको ८० प्रतिशत खर्च भएको कार्यालय तथ्याङ्क

म्याग्दी । हिमाली जिल्ला म्याग्दीमा गत आर्थिक वर्ष २०७७÷७८ मा कृषि ज्ञान केन्द्र म्याग्दीद्वारा सञ्चालित कृषिसम्बन्धी कार्यक्रमहरुको सार्वजनिकीकरण गरिएको छ । ज्ञान केन्द्रद्वारा गतवर्ष सञ्चालित कृषिका विभिन्न गतिविधिसहित प्रगति बिहीबार सार्वजनिक गरिएको हो ।

गएको वर्ष कृषि ज्ञान केन्द्रमार्फत जिल्लामा कुल सात करोड ५१ लाख रुपैयाँको लागतमा कृषिसम्बन्धी विभिन्न कार्यक्रमहरु सञ्चालन भएको थियो । गण्डकी प्रदेश सरकार तथा सङ्घीय सरकारको आर्थिक सहयोगमा कृषि ज्ञान केन्द्रले कृषकलक्षित विभिन्न कार्यक्रमहरु सञ्चालन गरेको जनाएको छ । गतवर्ष प्रदेश सरकारको आर्थिक सहयोगमा कुल पाँच करोड ६२ लाख रुपैयाँको लागतमा कृषिका कार्यक्रमहरु सञ्चालन गरिएको थियो ।

यसैगरी सङ्घीय सरकारको दुई करोड २९ लाख रुपैयाँको लगानीमा कृषिसम्बन्धी विभिन्न कार्यक्रमहरु पनि कृषकलाई लक्षित गरेर सञ्चालन भएको कृषि ज्ञान केन्द्र म्याग्दीले जनाएको छ । पत्रकार महासंघको समन्वयमा महासंघकै कार्यालयमा भएको कार्यक्रममाथि सहजीकरण गर्दै ज्ञान केन्द्रका प्रमुख गोविन्दराज कोईरालाले गतवर्ष समग्रमा कुल बजेटको ८० प्रतिशत रकम खर्च गरिएको जानकारी दिनुभयो ।

कार्यक्रममार्फत गतवर्ष बेनी नगरपालिका ३ भकिम्लीमा किबी खेती कार्यक्रम सञ्चालन गरिएको छ भने भकिम्लीकै मुसुङडोलेमा १ सय ५० रोपनीको जग्गामा आलु खेती गरी उत्पादित आलु पोखरासम्म निर्यात भएको छ । त्यस्तै रघुगंगा गाउँपालिका ६ ठाडाखानीमा पनि आलु खेतीलाई प्रोत्साहन गरिएको छ भने ८ नम्बर वडा कुईनेमङ्गलेमा आलु सङ्कलन गर्न भवन निर्माण गरिएको छ ।

बेनी ३ भकिम्ली, ४ सिङ्गा, ९ घतान र मालिका ६ दरबाङमा कागतीलगायत फलफुल खेती लगाइएको छ । गतवर्ष जिल्लाभर बाँझो रहेको २ सय रोपनी जग्गाको सदुपयोग गरी सुन्तला, ओखर, आलुलगायत खेतीको सुरुवात गरिएको कृषि ज्ञान केन्द्रका कृषि प्रसार अधिकृत गोविन्द पाण्डेले बताउनुभयो । उहाँका अनुसार भकारो सुधार तथा कार्यालय परिसरमा मौरीघार प्रदर्शन समेत गरिएको छ ।

गतवर्ष सुन्तलामा देखिएको औंसा किराको प्रकोप नियन्त्रण गर्न झरेका फल सङ्कलन गर्नुका साथै मंगला ५ अर्मनलगायत क्षेत्रमा औंसा किरा नियन्त्रणमा खाद्यपासो (प्रोटिन बेड) थापिएको थियो । त्यसैगरी बेनी नगरपालिका र मालिका गाउँपालिकामा सुन्तला खेती कार्यक्रमलाई प्रोत्साहन गरिएको छ भने मंगला, रघुगंगा र अन्नपूर्णमा आलु खेती विस्तारलाई जोड दिइएको छ ।

व्यावसायिक तरकारी खेती विस्तार तथा उत्पादन वृद्धि गर्नका लागि गतवर्ष जिल्लाको विभिन्न ठाउँका कृषकहरुलाई लक्षित गरेर प्लाष्टिक घरहरु निर्माण गरिएका छन् । कृषि ज्ञान केन्द्रले कृषकहरुलाई विभिन्न कार्यक्रमअन्तर्गत कुल २ सय १८ वटा मिनी टेलर अर्थात् खेत जोत्ने (ट्याक्टर) वितरण गरेको छ । यस्तै १ सय ४० वटा मौरी र गोलासहित मौरीघार पनि कृषकलाई वितरण गरिएको कृषि प्रसार अधिकृत पाण्डेले जानकारी दिनुभयो । कार्यक्रमलाई सम्बोधन गर्दै नेपाल पत्रकार महासंघ जिल्ला शाखा म्याग्दीका अध्यक्ष प्रकाश पौडेलले माटो परीक्षण गरेर कृषि उत्पादनलाई जोड दिनुपर्ने बताउनुभएको थियो ।

सम्बन्धित समाचार

thumbnail

बैंकिङ कसुरमा ९ लाख जरिवाना तोकिएका प्रतिवादी पक्राउ

काठमाडौं । बैंकिङ कसुर मुद्दामा ९ दिन कैद र ९ लाख जरिवाना तोकिएका फरार प्रतिवादीलाई केन्द्रीय अनुसन्धान ब्यूरोले पक्राउ गरेको छ । पक्राउ पर्नेमा काठमाडौंको कागेश्वरी मनोहरा नगरपालिका–२ घर भएका राम खड्का…

thumbnail

नेप्सेमा दोहोरो अंकको गिरावट

काठमाडौँ । साताको अन्तिम कारोबार दिन समेत रहेको बिहीबार सेयर बजार परिसूचक नेप्सेमा दोहोरो अंकको गिरावट आएको छ । नेपाल स्टक एक्सचेन्जका अनुसार आज नेप्से परिसूचक १५.११ अंकले घटेर ३ हजार ७९.८३…

thumbnail

पत्रकारलाई एक महिनाभित्र पारिश्रमिक दिने नागरिक दैनिकको बचन, पहिलो किस्ता आजैबाट

काठमाडौं । नेपाल रिपब्लिक मिडियाले कार्यरत् पत्रकारलाई पारिश्रमिक उपलब्ध गराउने बचन दिएको छ । बिहीबार वार्ता हुँदा मिडियाले एक महिनाभित्र सबै पारिश्रमिक दिने प्रतिवद्धता जनाएको हो। तर, पत्रकारले यो प्रतिवद्धता लिखित रुपमै…