बुटवल मण्डपको नाम फेर्ने मेयरको प्रस्तावको विरोध

बुटवल । बुटवल मण्डपको नामको अगाडि गिरिजाप्रसाद कोइराला थप्ने बुटवल उपमहानगरपालिकाको प्रस्तावको नेकपा एमाले लगायत दल र विभिन्न संघसंस्थाले विरोध जनाएका छन् । नेपाली कांग्रेसबाट निर्वाचित भएका मेयर खेलराज पाण्डेयले बुटवलको नीति तथा कार्यक्रम प्रस्तुत गर्दा बुटवल मण्डपको नाम गिरिजाप्रसाद कोइराला बुटवल मण्डप राख्ने प्रस्ताव गरेपछि यसको विरोध र आलोचना सुरु भएको हो ।

उपमहानगरको बुधबारको नगरसभामा मेयर पाण्डेयले बुटवल मण्डपको जग्गा प्राप्तिमा तत्कालीन कांग्रेस सभापति एवं पूर्व प्रधानमन्त्री स्वर्गीय कोइरालाको महत्वपुर्ण योगदान रहेको तर्क गर्दै बुटवल मण्डपको नामको अगाडि गिरिजा प्रसाद कोइराला थप्न नीति तथा कार्यक्रममा लिखित प्रस्ताव गर्नुभएको थियो । बुटवलमा यो मण्डप औद्योगिक प्रदर्शनी र व्यापार मेला आयोजना हुने थलोको रुपमा परिचित छ ।

उक्त प्रस्तावप्रति नगर सभा बैठकमै एमालेका जनप्रतिनिधिले असहमति जाहेर गरेका थिए । वडा नंं ११ का वडा सदस्य नकुल शाही ठकुरीले बहुमतका आधारमा यस्तो प्रस्ताव पारित गरिए सह्य नहुने र स्वीकार गर्न नसकिने बताएका थिए । एमाले मात्र होइन, स्वयं कांग्रेसकै सक्रिय कार्यकर्ताले समेत सामाजिक सञ्जालमार्फत यो प्रस्तावको विरोध गरेका छन् । कांग्रेस कार्यकर्ता हरि क्षेत्रीले बुटवल मण्डपको नामकरण नेताको नामबाट भन्दा स्थानीय संस्कृति, सम्पदा वा ऐतिहासिक पहिचानबाट राख्दा राम्रो हुने बताउनुभयो ।

कांग्रेसकै कार्यकर्ता कृष्णप्रसाद नेपालले बुटवल मण्डपको नाम फेर्ने प्रस्ताव निन्दनीय भएको बताउनुभएको छ । उहाँले भन्नुभएको छ, ‘बुटवल मण्डपको नाम परिवर्तन गर्नु निन्दनीय कार्य हो । यो गलत छ । कुनै नेता विशेषको नाम कहिँ कतै नजोडियोस् । यदि राख्नु नै छ भने ४ जना शहीदको नाममा राखियोस् ।’नेकपा माओवादी केन्द्रका प्रदेश सांसद दीपा विकले पनि बुटवल मण्डपलाई नाम फेर्न आवश्यक नरहेको बताउनुभएको छ ।

नेकपा एमालेको बुटवल नगर अध्यक्ष किसन ज्ञवालीले बुटवल मण्डपको नाम फेर्ने प्रस्तावको विरोध गर्दै नगर प्रमुख खेलराज पाण्डेयलाई काम गरेर जिकास निर्माण र समृद्धिले जनताको अवस्था बदल्न लाग्न सुझाव दिएका छन् । उहाँले भन्नुभएको छ, ‘पण्डितले झैं नाम फेर्न लाग्दा मेयरको न्वारान पनि अर्कै पण्डितले गरिदेला र अस्तित्वको संकट पर्ला ।’

पत्रकार डीआर घिमिरेले गिरिजाप्रसाद कोइरालाको नाममा कुनै पार्क वा सडकको नाम राख्न सकिने तर बुटवल मण्डपको रनाम फेर्नु उचित नहुने बताउनुभयो । ‘‘भोलि अर्को कुनै शक्ति सत्तामा आउँदा प्रतिशोध साँध्न सक्छ, गिरिजाप्रसाद कोइरालाजस्तो नायकलाई यसरी विवादमा नपारौं’, उहाँले भन्नुभयो ।नेपाल चेम्बर अफ कमर्श लुम्बिनी प्रदेश महासचिव जेपी कंडेलले बुटवल मण्डप कसैको पेवा नभई सबै व्यवसायिक संघ संस्थाको गौरवको विषय हो भन्दै जनप्रतिनिधिलाई विवादित निर्णय नगर्न आग्रह गर्नुभयो ।

बुटवलका ऋषिराम ज्ञवालीले बुटवल उपमहानगरपालिकाकै नाम गिरिजाप्रसाद कोइराला उपमहानगर राखौं भनेर ब्यङग्य गर्नुभएको छ । तर कांग्रेस निकट प्राध्यापक नुरजंग केसीले भने बुटवल मण्डपको नाम गिरिजा मण्डप बनाउने मेयर पाण्डेयको प्रस्तावको बचाउ गर्नुभएको छ । उहाँले महेन्द्र पार्कलाई पुष्पलाल पार्क, हिलपार्क जाने गेटमा जीवराज आश्रित पार्क, मदन भण्डारी लोकमार्ग, मदन भण्डारी स्वास्थ्य विज्ञान प्रतिष्ठान नामाकरण गरिएको उदाहरण दिनुभयो ।

गिरिजाप्रसाद कोइराला प्रधानमन्त्री हुँदा बुटवल मण्डपको लागि जग्गाको स्वीकृति दिई कम्पाउण्ड वाल लगाउन रकम उपलब्ध गराएकाले उहाँको नाममा नामाकरण गर्न प्रस्ताव गर्दा विरोध गर्नु नपर्ने उहाँले तर्क गर्नुभयो । पूर्वपश्चिम राजमार्गसंगै जोडिएको बुटवल मण्डपको १६ विघा क्षेत्रमा हाल संघीय बजेट अन्तर्गत बुटवल सम्मेलन केन्द्र र प्रदर्शनी केन्द्र निर्माण भइरहेका छन् । २०७१ सालदेखि यहाँ निर्माणको काम भइरहेको छ ।

नगर प्रमुख खेलराज पाण्डेले बुटवल मण्डपका लागि जग्गा प्राप्तिमा तत्कालीन प्रधानमन्त्री स्व। गिरिजाप्रसाद कोइरालाको महत्वपूर्ण भूमिका रहेकाले उहाँकै नाम राख्न लागेको बताउनुभयो । उहाँले बुटवल उपमहानगरपालिका वडा नं ११ मा नेकपाका संस्थापक महासचिव पुष्पलाल र नेपाली कांग्रेसका संस्थापक नेता विश्वेश्वरप्रसाद कोइराला र बुटवल उपमहानगरपालिकाका पूर्व नगर प्रमुख सूर्यप्रसाद प्रधानको प्रतिमासहितको पार्क निर्माण गरिने जनाउनुभयो । अनलाइनखबरबाट

सम्बन्धित समाचार

thumbnail

नगरपालिकाद्वारा विद्यालयलाई ल्यापटप वितरण

म्याग्दी । म्याग्दीको बेनी नगरपालिकाद्वारा आज (बिहीबार) नगरपालिकाअन्तर्गत विभिन्न वडामा सञ्चालनमा रहेका विद्यालयहरुलाई ल्यापटप वितरण भएको छ । नेपाल सरकारको चालु आर्थिक वर्षको वार्षिक स्वीकृत कार्यक्रमअनुसार नगरपालिकालाई प्राप्त सशर्ततर्फको कार्यक्रमबाट विद्यालयलाई ल्यापटप…

thumbnail

सिङ्गामा महिलाहरुको पाठेघर खस्ने रोगको स्क्रिनिङ सम्बन्धी भिआइए परीक्षण

निःशुल्क स्वास्थ्य शिविरबाट ग्रामीण भेगका सर्वसाधारणहरु लाभान्वित म्याग्दी ।म्याग्दीको बेनी नगरपालिकाको आयोजनामा हिँजो (बुधवार) बेनपा–४, सिङ्गामा निःशुल्क स्वास्थ्यसम्बन्धी शिविर सम्पन्न भएको छ । महिलामा पाठेघर खस्ने रोगको स्क्रिनिङ, रिङपेशरी तथा भिआइए जाँचसम्बन्धी…

thumbnail

तमानखोला गाउँपालिकाद्धारा बालगृह सञ्चालन

म्याग्दी। बागलुङको तमानखोला गाउँपालिकाले पालिका भित्र रहेका अनाथ, असहाय, अपाङ्गता भएका, अति गरिब बिपन्न बालबालिकाहरुको संरक्षणको लागि बालगृह सञ्चालनमा ल्याएको छ।उनीहरुलाई पालिकाले निशुल्क शिक्षा, स्वास्थ्य, खान, बस्न लगायतको व्यवस्था गरेको छ ।…