विश्वविद्यालयमा राजनीति नगरौं : सभामुख शाही

सुर्खेत । कर्णाली प्रदेशका सभामुख राजबहादुर शाहीले विश्वविद्यालयमा देखिएको राजनीतिलाई न्युनिकरण गर्दै पढ्ने र अनुसन्धान गर्ने थलोका रुपमा विकास गर्नु पर्ने सुझाव दिनुभएको  छ । मध्यपश्चिम विश्वविद्यालय सुर्खेतको १२ औं वार्षिकोत्सवका अवसरमा शुक्रबार आयोजित कार्यक्रमलाई सम्बोधन गर्दै शाहीले यस्तो सुझाव दिनुभएको हो ।

सभामुख शाहीले विश्वविद्यालयहरू विशुद्ध अनुसन्धानमूलक र प्राज्ञिक बन्नुपर्ने भन्दै प्राध्यापक, कर्मचारी र विद्यार्थीहरु राजनीतिक गतिविधिमा बढी केन्द्रीत हुने गरेकाले विश्वविद्यालयहरुको विश्वसनीयता गुम्न पुगेको विचार व्यक्त गर्नुभयो । शाहीले भन्नुभयो, ‘विश्वविद्यालय पढाउने, अनुसन्धान गर्ने थलो हो, राजनीति गर्ने र राजनीतिक प्रयोगशाला बन्ने थलोको रुपमा पहिचान बनाउनुहुँदैन । नेपालका विश्वविद्यालयमाथि अविश्वास बढ्दै गएको छ, अब सुधार गरेर गुमेको विश्वास फर्काउनुपर्छ ।’

विश्वविद्यालयहरू बेरोजगार उत्पादन गर्ने हब बन्न नहुने धारणा राख्दै उहाँले नेपाली युवा विद्यार्थीहरु उच्च शिक्षा पढ्न विदेश पलायन हुनुपर्ने अवस्थाको अन्त्य विश्वविद्यालयहरूले नै गर्नुपर्ने सुझाव दिनुभयो । शाहीको कर्णालीको बेरोजगारी समस्या हटाउन मध्यपश्चिम विश्वविद्यालयले नेतृत्वदायी भूमिका खेल्नुपर्ने तर्क थियो ।

साथै शाहीले विश्वविद्यालयलाई प्रविधिमैत्री बनाई विश्वको आवश्यकता अनुसार समय सापेक्ष परिवर्तन भई काम गर्नसक्ने दक्ष जनशक्ति उत्पादनमा ध्यान दिन जरुरी र उत्पादित शैक्षिक जनशक्तिलाई कसरी रोजगारीमा जोड्न सकिन्छ भन्नेतर्फ विश्वविद्यालयले ध्यान दिनुपर्नेमा जोड दिनुभयो । विश्वविद्यालयका उपकुलपति प्रा.डा.नन्दबहादुर सिंहले स्थापनाकालदेखि विभिन्न आरोह अवरोह पार गर्दै आएपनि पछिल्ला केही वर्षयता राजनीतिक खिचातानी रोकिएको बताउनुभयो ।

उपकुलपति सिंहले भन्नुभयो, ‘राम्रो काम गर्नेलाई जुनसुकै आस्था र विचारको भएपनि प्रोत्साहन गर्ने काम भएको छ । विश्वविद्यालयबाट कर्णालीका लागि मात्र नभई विश्वबजारमा प्रतिष्पर्धा गर्न सक्ने दक्ष जनशक्ति उत्पादनमा गर्ने प्रयत्नमा छौं, विश्वमा बढी बोलिने विभिन्न ६ वटा भाषामा पढ्ने व्यवस्था मिलाएका छौं ।’यस्तै, सिंहले विश्वविद्यालयले विगतका कमीकमजोरीबाट पाठ सिकेर अघि बढेको बताउनुभयो । सुर्खेतमा केन्द्रीय कार्यालय भई २०६७ साल असार ३ गते स्थापना भएको मध्यपश्चिम विश्वविद्यालयमा छ सङ्काय, सात केन्द्रीय र १० आंगिक क्याम्पस छन् । रातोपाटीबाट

सम्बन्धित समाचार

thumbnail

इनार सफा गर्ने क्रममा डुबेर सुर्खेतमा एक जनाको मृत्यु

सुर्खेत । इनारमा डुबेर सुर्खेतमा एक जनाको मृत्यु भएको छ। जिल्लाको भेरीगंगा नगरपालिका–१० तोलीखोलामा इनार सफा गर्न गएको एक जनाको डुबेर मृत्यु भएको जिल्ला प्रहरी कार्यालय सुर्खेतले जनाएको छ। प्रहरीका अनुसार भेरीगंगा…

thumbnail

पोखरा महानगरले तोकेको फेवातालको मापदण्ड कार्यान्वयन गर्न सर्वोच्चको रोक

कास्की । पोखरास्थित फेवातालको मापदण्ड घटाउने पोखरा महानगरपालिकाको निर्णय कार्यान्वन नगर्न सर्वोच्च अदालतले आदेश दिएको छ । मानबहादुर जि.सी. मेयर भएको बेला महानगरपालिकाको कार्यपालिका बैठकले मापदण्ड घटाउने निर्णय गरेको थियो । महानगरपालिकाले…

thumbnail

गठबन्धनको उद्देश्य सत्ता स्वार्थ मात्र : ज्ञवाली

चितवन । प्रमुख प्रतिपक्षी नेकपा एमालेका उपमहासचिव प्रदीप ज्ञवालीले गठबन्धन सरकारको एकमात्रै उद्देश्य सत्ता स्वार्थ भएको बताउनुभएको छ । भरतपुरमा सञ्चारकर्मीहरुसँग कुरा गर्दै उपमहासचिव ज्ञवालीले गठबन्धन सरकार आएदेखि मुलुकले एकपछि अर्को गम्भीर…