सुर्खेत । मंगलबार केन्द्रमा नेकपा एमाले मिलसँगै कर्णालीमा एमालेले गर्न लागेका कमिटी बैठकहरू स्थगित भएका छन् । एमाले प्रदेश कमिटीले एक सूचना जारी गर्दै एमालेले कर्णालीमा गर्न लागेका जिल्ला कमिटीका बैठकहरू स्थगित गरिएको जानकारी गराएको छ ।
एमाले कर्णाली प्रदेशका अध्यक्ष गोरख बोगटीले अर्को सूचना नभएसम्मको लागि सम्पूर्ण गतिविधि स्थगन गरिएको जानकारी दिए । उनले भने, ‘हामीले मंगलबारको बैठकबाट आगामी बिहीबार केन्द्रीय कमिटी बैठक र १६ गतेदेखि जिल्ला कार्यकर्ता भेला तथा संगठनका भेला गर्ने लगायतका निर्णय गरिएको थियो । प्रदेश कमिटीको गत भदौ ३ गते सम्पन्न एमाले विभाजन पछिको पहिलो बैठकले गरेको निर्णय अुनसार १० जिल्लामै विभिन्न मितिमा जिल्ला कमिटीका बैठकहरू गर्ने भनिएको थियो । तर, मंगलबार केन्द्रमा पार्टी ०२ जेठमा फर्किएसँगै स्थगित गर्नुपरेको हो ।’
नेकपा एमाले विभाजन भएपछि कर्णालीमा नेकपा एमाले र नेकपा समाजवादी पार्टीले आ–आफ्नो पक्षमा नेता,कार्यकर्तालाई लिनका लागि भेला तथा कार्यक्रमहरु गर्न थालिसकेका छन् । यद्यपि, मंगलबार एमालेको तेस्रो धारको नेतृत्व गरिरहेका भीम रावल सहितका नेताहरु १० बुँदे सहमती भएसँगै एमालेको बैठकमा सहभागी भएका छन् ।
यो सँगै पुन समाजवादी दलका नेताहरु तरङ्गित बनेका छन्। कर्णालीका नेकपा समाजवादी दलले पनि सुर्खेत, दैलेख लगायतका जिल्लाहरुमा जिल्ला स्तरिय कमिटीहरु निर्माण गरेर सांगठनीक रुपमा पार्टीका गतिविधिहरु सञ्चालन गरिसकेको छ। रातोपाटीबाट
