मेलम्चीको विकल्पमा ३ खोलाको पानी ल्याउन अध्ययन भइरहेको छ : खानेपानी मन्त्री

काठमाडौं । सरकारले मेलम्चीको विकल्पका रुपमा मकवानपुरको सिस्नेरी, ललितपुरको ठोसे र भक्तपुरको महादेव खोलाबाट काठमाडौं उपत्यकामा पानी ल्याउने विषयमा अध्ययन सुरु गरेको छ ।

प्रतिनिधिसभामा मन्त्रालयगत बजेट छलफलका क्रममा सांसदहरुले उठाएका प्रश्नको मंगलबार जवाफ दिँदै खानेपानी मन्त्री उमाकान्त चौधरीले मेलम्ची आयोजनाको विकल्प र पूरक योजनाको रुपमा तीन खोलाको अध्ययन भइरहेको बताउनुभएको हो । ‘मेलम्ची खानेपानी योजनाको विकल्प र पूरकको रुपमा काठमाडौ उपत्यकाको दिगो खानेपानी व्यवस्थापनका लागि मकवानपुरको सिस्नेरी खोला, ललितपुरको ठोसे र भक्तपुरको महादेव खोलाबाट काठमाडौं उपत्यकामा पानी आपूर्ति गर्न अध्ययन भइरहेको छ’ उहाँले भन्नुभयो ।

वर्षायाम सुरु भएको कारण हाल सरकारले काठमाडौंमा मेलम्चीको पानी ल्याएको छैन । मन्त्री चौधरीका अनुसार वर्षायाममा मेलम्ची खोलामा आउन सक्ने बाढीले सुरुङमा क्षति पुर्‍याउन सक्ने हुनाले पानी ल्याउन बन्द गरिएको हो । यसअघि २०७८ असार १ गते आएको बाढीले मेलम्चीको हेडवर्क्स (मुहान) र अन्य संरचना ध्वस्त पारेको थियो । हेडवर्क्ससम पुग्ने सडक पनि बाढीले बगाएको थियो ।

सरकारले चैत मशान्तदेखि मेलम्चीको पानी अस्थायी रुपमा वितरण गरे पनि हाल बन्द गरिएको छ । ‘मेलम्ची जलाधरमा गत वर्ष आएको बाढीका कारण मेलम्ची नदी क्षेत्रमा करोडौं धनमिटर गेग्रान थुप्रिएको छ र उक्त गेग्रान वर्षामा लेदोको रुपमा बग्ने सम्भावना छ’ उहाँले भन्नुभयो, ‘सुरुङ सुरक्षाका लागि मौसमविदको सुझाव र अर्लि वार्निङ सिष्टम र विज्ञको सुझावका लागि वर्षायामभरि बन्द गरिएको छ ।’

मेलम्चीको पानी बन्द भएको बेला काठमाडौं उपत्यकामा पानी आपूर्ति कम हुन नदिन बागमतीबाट सुन्दरीजलमा पानी पथान्तरण गर्ने र बोरिङहरुको क्षमता पनि बढाउने मन्त्री चौधरीले बताउनुभएको छ । एसियाली विकास बैंकको टोलीले मेलम्ची खोलाको भौगर्भिक अवस्थाको अध्ययन गरिरहेको भन्दै मन्त्री चौधरीले सो अध्ययन प्रतिवेदन अनुसार आगामी आर्थिक वर्षदेखि पहिरो नियन्त्रणको काम अघि बढाउने जानकारी दिनुभयो । अनलाइनखबरबाट

सम्बन्धित समाचार

thumbnail

नगरपालिकाद्वारा विद्यालयलाई ल्यापटप वितरण

म्याग्दी । म्याग्दीको बेनी नगरपालिकाद्वारा आज (बिहीबार) नगरपालिकाअन्तर्गत विभिन्न वडामा सञ्चालनमा रहेका विद्यालयहरुलाई ल्यापटप वितरण भएको छ । नेपाल सरकारको चालु आर्थिक वर्षको वार्षिक स्वीकृत कार्यक्रमअनुसार नगरपालिकालाई प्राप्त सशर्ततर्फको कार्यक्रमबाट विद्यालयलाई ल्यापटप…

thumbnail

सिङ्गामा महिलाहरुको पाठेघर खस्ने रोगको स्क्रिनिङ सम्बन्धी भिआइए परीक्षण

निःशुल्क स्वास्थ्य शिविरबाट ग्रामीण भेगका सर्वसाधारणहरु लाभान्वित म्याग्दी ।म्याग्दीको बेनी नगरपालिकाको आयोजनामा हिँजो (बुधवार) बेनपा–४, सिङ्गामा निःशुल्क स्वास्थ्यसम्बन्धी शिविर सम्पन्न भएको छ । महिलामा पाठेघर खस्ने रोगको स्क्रिनिङ, रिङपेशरी तथा भिआइए जाँचसम्बन्धी…

thumbnail

तमानखोला गाउँपालिकाद्धारा बालगृह सञ्चालन

म्याग्दी। बागलुङको तमानखोला गाउँपालिकाले पालिका भित्र रहेका अनाथ, असहाय, अपाङ्गता भएका, अति गरिब बिपन्न बालबालिकाहरुको संरक्षणको लागि बालगृह सञ्चालनमा ल्याएको छ।उनीहरुलाई पालिकाले निशुल्क शिक्षा, स्वास्थ्य, खान, बस्न लगायतको व्यवस्था गरेको छ ।…