म्याग्दी ।म्याग्दीको मालिका गाउँपालिका–१,निस्कोट स्थित भट्टखोलाका गमप्रसाद घर्तीको उपचारको लागि अमेरिका र पोर्तुगलबाट आर्थिक सहयोग प्राप्त भएको छ ।फोक्सोमा पानी जम्ने रोगबाट पीडित घर्तीको उपचारका लागि निस्कोट समाज अमेरिकाबाट एक लाख रुपैयाँ र निस्कोट समाज पोर्तुगलबाट पचास हजार आर्थिक सहयोग गरिएको निस्कोट समाज पोर्तुगलका कोषाध्यक्ष सबिन्द्र पुनले बताउनुभयो ।
उहाँका अनुसार ,घर्तीको उपचारमा सहयोग पुगोस् भनेर अमेरिका र पोर्तुगलमा रहेका निस्कोटबासीबाट संकलित उक्त रकम आफन्त भविसरा फगामी मार्फत विरामी घर्तीलाई हस्तान्तरण गरिएको छ । अन्दाजी ३५-३६ वर्षीय गमप्रसादले पोखरा स्थित गण्डकी अस्पतालमा उपचार गराउँदै आउनुभएको छ ।
पारिवारिक आर्थिक कमजोर भएको र उपचारमा धेरै खर्च लाग्ने भएपछि सबैलाई सहयोग गर्न निस्कोट समाज पोर्तुगलका अध्यक्ष तिलक पुनले अपिल गर्नुभएको छ । अमेरिका ,पोर्तुगलमा रहेका निस्कोटबासीले यसअघि पनि विभिन्न रोगबाट पीडित व्यक्तिको उपचार ,आगलागी पीडित लगायतलाई सहयोग गर्दै आएका छन् ।
