बेनी, १० चैत । म्याग्दीको बेनी नगरपालिका–२ हाडेभिरमा पार्किङ गरी राखिएको एक बोलेरो जिपमा मंगलबार बिहान आगजनी गरिएको छ। बिहान करिब ५ः३० बजेको समयमा ग २ च १०५४ नम्बरको बोलेरो जिप अज्ञात समूहद्वारा जलाइएको हो ।
स्थानीयका अनुसार सडक किनारमा पार्किङ गरिएको अवस्थामा रहेको जिप एक्कासि बलिरहेको देखेपछि आसपासका बासिन्दाले प्रहरीलाई खबर गरेका थिए । त्यसपछि स्थानीयवासी र प्रहरीको सक्रियतामा आगो नियन्त्रणमा लिइएको भए पनि गाडीको भित्री भाग पूर्ण रूपमा जलेर क्षति पुगेको छ।
उक्त बोलेरो जिप युवा व्यवसायी सुमन श्रेष्ठको रहेको खुलेको छ । घटनाको जानकारी प्राप्त हुनासाथ जिल्ला प्रहरी कार्यालय म्याग्दीबाट प्रहरी टोली घटनास्थलमा पुगेर अनुसन्धान सुरु गरिसकेको छ । घटनास्थलबाट प्रमाण संकलन, मुचुल्का उठाउने तथा आवश्यक प्राविधिक अध्ययनको काम भइरहेको प्रहरीले जनाएको छ ।
जिल्ला प्रहरी कार्यालय म्याग्दीका सूचना अधिकारी सागर तिमिल्सिनाले प्रारम्भिक अनुसन्धानका आधारमा आगजनी नियोजित रूपमा गरिएको हुन सक्ने आशंका व्यक्त गरेका छन् । “हामीलाई बिहानै घटनाबारे जानकारी आएपछि तत्काल प्रहरी टोली खटाएर आवश्यक अनुसन्धान प्रक्रिया अघि बढाइएको छ,” उहाँले भन्नुभयो, “घटनामा संलग्न व्यक्तिको पहिचान र खोजी कार्य तीव्र रूपमा भइरहेको छ । सीसीटीभी फुटेजसहित अन्य प्राविधिक माध्यमबाट समेत अनुसन्धान गरिरहेका छौँ ।”
पछिल्लो समय बेनी बजार आसपासका क्षेत्रमा सवारी साधनमाथि हुने आगजनी तथा तोडफोडका घटनाहरू बढ्न थालेपछि स्थानीयवासी तथा व्यवसायीहरूमा चिन्ता बढेको छ । सुरक्षाको प्रत्याभूति गर्न तथा यस्ता आपराधिक गतिविधि नियन्त्रण गर्न सरोकारवाला निकायले प्रभावकारी कदम चाल्नुपर्ने मागसमेत उठ्न थालेको छ ।
