म्याग्दी, आइतबार चैत २३ गते । म्याग्दीको बेनी खानेपानी तथा सरसफाई उपभोक्ता संस्थाले लकडाउनका कारण प्रभावित भएका विपन्नको राहतका लागि एक लाख रुपैयाँ सहयोगका साथै फागुन महिनाको खानेपानी महशुलमा छुट दिने निर्णय गरेको छ ।
संस्थाका अध्यक्ष सुवासकुमार श्रेष्ठको अध्यक्षतामा आइतबार बेनीमा बसेको बैठकले विश्वब्यापी महामारीको रुप लिएको कोरोना भाइरस रोकथामका लागि गरिएको लकडाउनका कारण प्रभावित भएका विपन्नका लागि राहत वितरण गर्न बेनी नगरपालिकाको ७ र ८ नम्बर वडा कार्यालयलाई पचास पचास हजार रुपैयाँ सहयोग गर्ने निर्णय गरेको हो ।
विश्वव्यापी महामारीको रुपमा फैलिएको नोभल कोेरोना भाइरस (कोभिड-१९) रोकथाम तथा नियन्त्रणका लागि जारी लकडाउनबाट प्रभावित विपन्न परिवारलाई राहत वितरणका लागि बेनी नगरपालिका–७ र ८ नम्बर वडा कार्यालाई प्रति वडा पचास हजार रुपैयाँका दरले एक लाख र फागुन महिनाको खानेपानी महशुलमा २० प्रतिशत छुट गर्ने तथा सोही महिनाको बिलम्ब शुल्क समेत मिनाह गर्ने निर्णय भएको संस्थाका अध्यक्ष श्रेष्ठले बताउनुभयो ।
उहाँका अनुसार यस्तै उपभोक्ताहरुले घरबाटै आफ्नो मिटरमा चढेको अंक संस्थाको टेलिफोन र मोवाइलमा सम्पर्क गरेर जानकारी गराउन अनुरोध गरेको छ । संस्थाका बेनी बजारमा एक हजार घरधुरी उपभोक्ता रहेका छन् । इसेवा र आइएमई पेको माध्यमबाट महशुल भुक्तानी गर्ने व्यवस्था मिलाइएको अध्यक्ष श्रेष्ठले जानकारी दिनुभयो ।
