बेनी।म्याग्दी जिल्लामा ६ हजार ४ सयभन्दा बढी बालबालिकाले दादुरा–रुबेला बिरुद्धको खोप लगाएका छन् । म्याग्दीका ६ वटै स्थानीय तहमा फागुन १६ देखि २१ गतेसम्म सञ्चालन भएको खोप अभियानमा जिल्लाभर निर्धारित समय तालिकामा ६ हजार ६ जना लक्ष्य रहेकोमा ६ हजार ४ सय ३४ जनाले खोप लगाएको स्वास्थ्य कार्यालय म्याग्दीका दादुरा खोप अभियानका प्रवत्ता बिरेन्द्रकुमार चौधरीले जानकारी दिनुभयो ।
‘म्याग्दी बाहिरबाट आएका बालबालिकाले समेत खोप लगाएका छन्, पर्वतका बालबालिकाले समेत खोप लगाएका छन्’ चौधरीले भन्नुभयो । उहाँका अनुसार खोप अभियानमा यसअगाडी नियमित खोप नलगाएका ३ जना बालबालिका भेटिएकोमा यसपटक खोप लगाएर बाँकी खोप समेत तालिका अनुसार लगाइने बताउनुभयो ।
बेनी नगरपालिकामा भारतीय बालबालिका तथा मजदुरी र जागिरको सिलसिलामा बाहिरी जिल्लाबाट आएकाले समेत खोप केन्द्रमा गएर खोप लगाएकाले लक्ष्यभन्दा धेरै अर्थात १०७।१ प्रतिशतले खोप लगाएको जिल्ला खोप समन्वय समितिले जनाएको छ । ९ महिनादेखि ५ बर्षमूनिका ६ हजार ५७० बालबालिका मध्ये ३ हजार २ सय ७८ जना बालबालिकाले खोप लगाएका छन् । खोप अभियान फागुन २१ गतेसम्म जारी रहनेछ ।
पहिलो र दोस्रो दिन म्याग्दीका विकट बस्तीमा खोप अभियानमा अभिभावकले बालबालिकालाई लिएर खोप केन्द्रमा पुगेका छन् । अन्नपूर्ण, मालिका गाउँपालिका र बेनी नगरपालिकामा लक्ष्यभन्दा धेरै बालबालिकाले खोप लगाउनुमा जलविद्युत सहित अन्य विकास निर्माणका क्षेत्रमा बाहिरी जिल्लाबाट आएका मजदुर धेरै भएको कारण रहेको बताउनुभयो ।
खोप कार्यक्रममा उत्साहजनक सहभागिता भएको र खोपकै कारण बालबालिकामा असामान्य स्वास्थ्य असर नदेखिएको बताइएको छ । १५० जना स्वास्थ्यकर्मीका अलावा ३०० जना स्वमसेवक अभियानमा परिचालन भएका थिए ।
