काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले मन्त्रिपरिषद हेरफेरको सम्भावना रहेको बताउनुभएको छ । यसबारे कुराकानी भइरहे पनि औपचारिक निर्णयमा नपुगिएको उहाँले बताउनुभयो । आजै प्रधानमन्त्री शेरबहादुर देउवासँग प्रचण्डले बालुवाटारमा भेटवार्ता गर्नुभएको थियो।
‘मन्त्रिपरिषदमा हेरफेरको कुरा त चलेको छ, तर अहिलेसम्म औपचारिक ढंगले टुंगिएको छैन,’ आज जनकपुर पुगेका प्रचण्डले पत्रकारहरूसँग भन्नुभयो, ‘मन्त्रिपरिषद हेरफेरको सम्भावना छ। केही मन्त्रालय हेरफेरको सम्भावना छ।’उहाँले केही नयाँ मन्त्री आउन सक्ने बताउनुभयो। ‘केही केही आउने सम्भावना छ। मैले प्रधानमन्त्रीसँग भनिरहेको छु–ठूलो त्याग माओवादीले गरेको छ गठबन्धनका लागि।
जति पाउनुपर्ने त्यति मन्त्रालय माओवादीले पाएको छैन,’ उहाँले भन्नुभयो, ‘प्रधानमन्त्रीले महाधिवेशनसम्म सहयोग गर्नुपर्यो भन्नुभएको र माधव नेपालजीले पनि हामी नयाँ छौं सहयोग गर्नुपर्यो भन्नुभएको हो। मन्त्रिपरिषद हेरफेरको अवस्था आए हाम्रो हैसियतअनुसार मन्त्रालय चाहिन्छ। यसमा प्रधानमन्त्री सहमत पनि हुनुहुन्छ।’ उहाँले फरक प्रसंगमा आफ्नै खुट्टामा उभिएर माओवादी चुनावमा जाने तयारीमा रहेको पनि बताउनुभयो । तर गठबन्धन माओवादीको नेतृत्वदायी भूमिकाले बनेको पनि उहाँको भनाइ थियो । सेतोपाटीबाट
