म्याग्दी ,शुक्रबार चैत २८ गते ।
गण्डकी प्रदेशका मुख्यमन्त्री पृथ्वी सुब्बा गुरुङले नोभल कोरोना भाइरस कोभिड–१९ विरुद्ध लड्न सबैलाई आह्वान गर्नुभएको छ । जिल्ला र बेनी अस्पतालमा समस्या र अवस्थाका कारेमा शुक्रबार स्थलगत अवलोकन तथा निरिक्षण गर्न म्याग्दीको सदरमुकाम बेनी आउनुभएका मुख्यमन्त्री गुरुङले जिल्ला स्थित जिल्ला प्रशासन कार्यालय म्याग्दीका,बेनी नगरपालिका ,स्वाथ्य कार्यालय ,सुरक्षा निकाय र बेनी अस्पताल विकास समिती मार्फत म्याग्दीमा लकडाउनको अवस्था, अस्पताल र गाउँपालिकामा स्थापना गरिएका क्वारेन्टाइन र आइसोलेशनमा बसेकाहरुलाई प्रदान गरिने सेवा सुविधा, व्यवस्थापकीय क्षमता र अस्पतालका समस्याका बारेमा जानकारी लिनुभयाे ।
मुख्यमन्त्री गुरुङले कोरोना भाइरसविरुद्ध लडाइमा म्याग्दी अग्रमोर्चामा रहेको बताउनुहुँदै प्रशंसा गर्नुभयो । ‘कोरोना सबैको साझा शत्रु हो ,मिलेर लडौं’मुख्यमन्त्री गुरुङले भन्नुभयो, ‘कोरोना रोकथाम तथा नियन्त्रणका लागि प्रदेश सरकार लागिपरेको छ,तपाइहरु पनि लकडाउनको पुर्ण पालना गरेर साथ दिनुस् ।’ यसैगरी बेनी अस्पतालको अवस्था र समस्याका बारेमा बुझ्दै मुख्यमन्त्री भन्नुभयो ,‘प्रदेश सरकारले आवश्यक स्रोत र साधनको व्यवस्था गरेको छ’,‘अस्पतालले बिरामीको उपचार र कोरोना रोकथामका लागि प्रभावकारी भुमिका निर्वाह गर्न सक्नुपर्छ ।’
मुख्यमन्त्री गुरुङले उपचारका क्रममा आवश्यक उपकरणका विषयमा प्रदेश सरकार जानकार रहेको उल्लेख गर्नुहुँदै आवश्यक उपकरण तथा दरबन्दी मिलानका लागि गृहकार्य भइरहेको बताउनुभयो । उहाँले कोरोना विरुद्ध लडाइमा खटिने स्वास्थ्यकर्मीलाई संघिय सरकारले ल्याएको २५ लाख रुपैयाँको विमा कार्यक्रमलाई प्रदेश सरकारले पाँच लाख रुपैयाँ थप गरेर ३० लाख रुपैयाँको विमा गरिदिने जानकारी दिनुभयो ।
यसैगरी लकडाउनबाट प्रभावित गरिब,दैनिक ज्यालादारी गर्ने मजदुर ,श्रमिक तथा विपन्न परिवारलाई राहत वितरण गर्न संघ र प्रदेश सरकारले स्थानीय सरकार मार्फत उपलब्ध गराएको बताउनुभयो । लकडाउनलाई प्रभावकारी बनाउन प्रत्यक जिल्लामा बजेट विनियोजन गरिएको बताउनुभयो । विदेशबाट गण्डकी प्रदेश आएका सबैको स्वाव परिक्षण गरिने उहाँले जानकारी दिनुभयो । मुख्यमन्त्री गुरुङले चैत महिना यता विभिन्न मुलुकबाट प्रदेशमा भित्रिएका ३७ सय पचास जनाको कोरोना परिक्षणका लागि तयारी भइरेको बताउनुभएको हो । मुख्यमन्त्री गुरुङले कोरोना विरुद्धको लडाइमा म्याग्दी अग्रमोर्चामा रहेको बताउनुभयो ।
प्रमुख जिल्ला अधिकारी ज्ञाननाथ ढकाल ,बेनी नगरपालिकाका मेयर हरिकुमार श्रेष्ठ ,बेनी अस्पताल विकास समितिका अध्यक्ष बेल बहादुुर कटुवाल तथा सुरक्षा निकायका प्रतिनिधिहरुले मुख्यमन्त्री गुरुङलाई अस्पताल तथा जारि लकडाउनमा जिल्लामा भएका गतिविधिका बारेमा जानकारी गराएका थिए ।
