काठमाडौँ । नेपाली काँग्रेसको संस्थापन इतर पक्षीय जिल्ला सभापतिहरूको बैठक बस्दै छ । पार्टीको १४ औँ महाधिवेशनको सुनिश्चितता र सरकारलाई जनपक्षीय काम गर्न सुझाव तथा दबाब सिर्जना गर्न बैठक बस्न लागेको काठमाडौँका जिल्ला सभापति सबुज बानियाँले जानकारी दिनुभयो । आज अपराह्न १२ बजेपछि ठमेलको एक होटेलमा बैठक सुरु हुने छ ।
नेपाली काँग्रेस नुवाकोटका जिल्ला सभापति जगदिश्वरनरसिंह केसीका अनुसार आजको बैठक करिब ४० जिल्ला सभापति सहभागी हुने छन् । १५ जना बढी अहिले नै बैठक स्थल पुगिसकेको केसीले बताउनुभयो । उहाँले भन्नुभयो, ‘समयमा महाधिवेशन गरेर पार्टीलाई वैधानिक सङ्कटबाट जोगाउनुपर्छ । त्यसका लागि हामीले पार्टी नेतृत्वलाई दबाब दिन बैठक बस्दै छौँ ।’ संस्थापन इतरको बैठकमा पार्टीको केन्द्रीय नेताहरूलाई भने बोलाइएको छैन ।
केसीले भन्नुभयो, ‘हामी जिल्ला सभापतिका बीचमा मात्र छलफल गर्न खोजेका हौँ । केन्द्रीय नेताहरूलाई बोलाइको छैन । आजको बैठक पनि जिल्ला सभापतिहरूको नियमित बैठककै निरन्तरता हो ।’संस्थापन इतर पक्षका काठमाडौँ उपत्यकामा उपलब्ध करिब २०/२२ जना जिल्ला सभापतिहरुबीच बेला बेला बैठक बस्दै आएको छ ।
उनीहरूले राष्ट्रिय र आन्तरिक पार्टी राजनीतिबारे साझा धारणा सार्वजनिक गर्दै आएका छन् । पार्टी महाधिवेशन अनिश्चित हुन थालेपछि यसपटक भने संस्थापन पक्षका अधिकांश जिल्ला सभापतिबीच छलफल हुँदैछ । केही दिनअघि मात्र जिल्ला सभापतिहरूले क्रियाशील सदस्यताको सूची सार्वजनिक गर्ने माग गरेका थिए । रातोपाटीबाट
