काठमाडौँ । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ रौतहटको कटहरियामा हुने आमसभालाई सम्बोधन गर्न जाने हुनुभएको छ । गत २९ कात्तिकमा मिति तय भए पनि प्रचण्डको स्वास्थ्यका कारण स्थगित भएको आमसभालाई सम्बोधन गर्न उनी शनिबार रौतहट जान लाग्नुभएको हो ।
यो क्षेत्र नेकपा (एमाले) नेता प्रभु साहको निर्वाचन क्षेत्र हो । साह माओवादी परित्याग गरी एमालेमा प्रवेश गर्नुभएको थियो। प्रचण्डले सभालाई सम्बोधनका साथै पार्टी प्रवेश कार्यक्रम पनि हुने जिल्ला संयोजक देवेन्द्र पटेलले जानकारी दिनुभयो । माओवादी प्रवेश गर्ने जिल्ला तहका प्रतिनिधि र स्थानीय तहका निर्वाचित वडा अध्यक्षलाई प्रचण्डले पार्टी प्रवेश गराउने छन् ।
साहको निर्वाचन क्षेत्रमा माओवादीले जित हासिल गरेको मौलापुर र कटहरियाका मेयर भने पार्टी परित्याग गरी एमालेमा प्रवेश गरिसकेका छन् । सोही स्थानमा माओवादीले प्रचण्डलाई विशेष अतिथिका रुपमा बोलाएको हो । पूर्वमाओवादी सांसद् साहको गृहनगर मौलापुरमा आमसभा राख्ने प्रस्ताव पार्टी भित्रबाट आए पनि अन्ततः छिमेकी नगरपालिका कटहरियामा आमसभा हुने छ । नागरिक खबरबाट
