काठमाडौं । एमाले अध्यक्ष केपी शर्मा ओलीले एमाले बाहेकका राजनीतिक दल वामपन्थी खोल ओडेर दक्षिणपन्थीको सेवामा लागेको बताउनुभएको छ । सोमबार एमाले संखुवासभा जिल्ला अधिवेशन उद्घाटन समारोहलाई सम्बोधन गर्दै अध्यक्ष ओलीले आफूलाई वामपन्थी भन्ने दलहरु प्रतिक्रियावादीहरुको खेमामा पुगेको आरोप लगाउनुभयो ।
उहाँले देशमा परिवर्तन चाहाने एकमात्रै वामपन्थी पार्टी एमाले भएको दावी समेत गर्नुभयो । ‘वामपन्थीको खोल ओडेका पार्टीमा साथीहरु अलमल नगर्नुहोस् । एमाले मात्रै परिवर्तन चाहाने, देशमा उन्नती, प्रगति चाहाने, सामाजिक न्याय र समानता दिने पार्टी हो’, ओलीले भन्नुभयो, ‘वामपन्थी खोल ओडेर प्रतिक्रियावादी काम गर्ने दक्षिणपन्थीको सेवामा समर्पित हुने, कम्युनिष्ट पार्टी फुटाउने, सरकार ढाल्ने र आफूलाई दक्षिणपन्थी खेमामा समाहित गर्ने तत्व र तीनका पार्टीमा नअलमलिन आग्रह गर्छु ।’
अध्यक्ष ओलीले एमालेको काँधमा देश बनाउने अभिभारा रहेको भन्दै त्यो अभिभाराबाट एमाले नभाग्ने बताउनुभयो । पुर्व प्रधानमन्त्री समेत रहेका ओलीले देश विकासका लागि एमाले नै चाहिने भन्दै एमाले नेतृत्वको सरकारबाहेक अरुले देशको विकास गर्न नसक्ने बताउनुभयो । उहाँले एमालेले देशमा विकासको लहर ल्याएको उदाहरण दिदै त्यही विकास देख्न चाहनेहरुले आफ्नो नेतृत्वको सरकार ढालेको आरोप लगाउनुभयो ।
‘विकासका लागि एमाले नै चाहिन्छ,किमाथाङका सडक एमालेले सुरुवात गर्यो’, पूर्वप्रधानमन्त्री समेत रहेका अध्यक्ष ओलीले विराटनगर–किमाथांका बाटो निर्माण भइसकेपछि चीन र समुद्रसँगको नेपालको सम्बन्ध टुट्न नदिने बताउनुभयो । ओलीले नेपाल विश्वको १ नम्बर सुन्दर देशमा परेको भन्दै ओलीले प्राकृतिक रुपमा मात्रै होइन, सुशासन, स्वच्छता, मानवीयता र जनताको सुखको हिसावले यसलाई एक नम्बर देश बनाउने दावी समेत गर्नुभयो । रातोपाटीबाट
