लोसपाभित्र चर्को असन्तुष्टि, अध्यक्ष ठाकुरका विरुद्ध पुनः आन्दोलन गर्ने तयारी

काठमाडौँ । लोकतान्त्रिक समाजवादी पार्टी नेपालका अध्यक्ष महन्थ ठाकुरले आफूहरुको माग पूरा नगरेको भन्दै सो पार्टीको असन्तुष्ट पक्ष पुनः आन्दोलन गर्ने तयारीमा जुटेको छ । अध्यक्ष ठाकुरले पार्टीको बैठक नबसाई एकलौटी निर्णयहरु गरेको दावी गर्दै सो पार्टीका असन्तुष्ट नेताहरुले संघर्षका कार्यक्रम ल्याउने तयारी गरेका हुन् ।

अध्यक्ष ठाकुरका एकलौटी निर्णयका विरुद्ध लोसपाका असन्तुष्ट नेताहरु यही पुस १२ गतेदेखि पार्टी कार्यालयमा धर्ना बसेका थिए । त्यसपछि अध्यक्ष ठाकुरले असन्तुष्ट पक्षसँग आफ्नो निवासमा बोलाएर वार्ता गर्नुभएको थियो । वार्तामा अगामी दिनमा सबैको सहमतिमा निर्णय लिने र बैठकहरू बसाउने प्रतिबद्धता अध्यक्ष ठाकुरले गरेका थिए । तर त्यसपछि पनि उहाँले विभिन्न नियुक्ति एकलौटी ढंगबाट गर्न थालेपछि थप संघर्ष गर्नुपर्ने अवस्था आएको लोसपाका नेता सञ्जय सिंहले बताउनुभयो ।

उहाँले भन्नुभयो, ‘हामीले अध्यक्ष ठाकुरसँग छलफल गर्दा उहाँले पार्टीमा भएका मनोनयनहरुको बारेमा पुर्नविचार गरिने र अगामी निर्णयहरु पार्टीको बैठक बसेर तय गरिने भन्नुभएको थियो तर उहाँ पुरानै शैलीमा हिड्न थाल्नुभएको छ, भटाभट मनोनयनहरु गरिनै रहनुभएको छ, पार्टीका बैठकहरू पनि बसाउनुभएको छैन, त्यही भएर उहाँका विरुद्ध पुनः आन्दोलनका थप कार्यक्रम तय गर्ने तयारी गरिरहेका छौं ।’जनकपुरमा माघको पहिलो हप्ता बृहत बैठक राखेर आन्दोलनका बारेमा छलफल गरि अगाडि बढ्ने तयारी भएको समेत उहाँले बताउनुभयो । अर्का नेता रमण पाण्डेले पनि पार्टी अध्यक्षमा सुधार नआएको बताउनुभयो।

उहाँले भन्नुभयो, ‘पार्टीमा भएका त्रुटीलाई अध्यक्षज्यूले सुधार गर्नुहुन्छ जस्तो आफूलाई लागेको थियो तर हालसम्म त्यस्तो केही संकेत पाइएन ।’ आफूले अध्यक्ष ठाकुरलाई भेटेर पनि यी कुरा सम्झाएको तर कुनै प्रतिकृया नदिएको भन्दै पाण्डेले असन्तुष्टि पोख्नुभयो । पाण्डेले अब बैठक बसेर संघर्षका थप कार्यक्रमहरु सार्वजनिक गर्ने जानकारी दिए । पुसको दोस्रो हप्ता लोसपाका असन्तुष्ट नेताहरुले बबरमहलस्थित पार्टी कार्यालयमा धर्ना दिएका थिए । रातोपाटीबाट

तपाईको प्रतिक्रिया

सम्बन्धित समाचार