म्याग्दी । म्याग्दीमा बाम–लोकतान्त्रिक गठबन्धनका उम्मेद्वार विजयी भएका छन् । प्रतिनिधिसभा सदस्यमा वाम –लोकतान्त्रिक गठबन्धनका उम्मेद्वार नेपाली कांग्रेसका जिल्ला सभापति खमबहादुर गर्बुजा ‘खम्बिर’ , नेकपा माओवादी केन्द्रबाट प्रदेश (१) मा हरि भण्डारी र प्रदेश ख मा माओवादी केन्द्रका जिल्ला संयोजक रेशमबहादुर जुग्जाली ’सुविन’ विजयी हुनुभएको हो ।
नेपाली कांग्रेसका सभापति गर्बुजाले नेकपा एमालेका उम्मेद्वार हरीकृष्ण श्रेष्ठलाई ३८३२ मतान्तरले पराजित गर्नुभयो । गर्बुजाले २४०२१ र श्रेष्ठले २०१८९ मत प्राप्त गर्नुभएको निर्वाचन अधिकृतको कार्यालयले जनाएको छ।त्यस्तै प्रदेश क्षेत्र (१) मा नेकपा माओवादी केन्द्रका युवा नेता हरी भण्डारी विजयी हुनुभएको छ । भण्डारीले नेकपा एमालेका जिल्ला अध्यक्ष देवेन्द्रबहादुर कटुवाललाई ९७५ मतान्तरले पराजित गर्नुभयो। भण्डारीले १२ हजार ७४० र कटुवालले ११७६५ मत प्राप्त गर्नुभएको थियो ।
म्याग्दीको प्रदेशसभा क्षेत्र (ख)मा यसअघिनै गठबन्धनबाट उम्मेद्वार नेकपा माओवादी केन्द्रका जिल्ला संयोजक जुग्जालीले एमालेका यामबहादुर गर्बुजालाई १०१ मतान्तरले पछि पार्दै निर्वाचित हुनुभएको थियो । जुग्जालीले ९ हजार ४५४ र गर्वुजाले ९ हजार ३५३ मत प्राप्त गर्नुभएको थियो । निर्वाचित तीनै जनालाई मुख्य निर्वाचन अधिकृत कृष्णप्रसाद नेपालले प्रमाणपत्र वितरण गर्नुभएको थियो ।
प्रतिनिधि सभामा विजयी गर्बुजा वि.सं २०७० र २०७४ मा एमालेका उम्मेद्वारसँग झिनो मतान्तरले पराजित हुनुभएको थियो । तेस्रो पटक प्रतिनिधिसभा सदस्य उम्मेद्वार बन्नुभएका गर्बुजालाई नेकपा माओवादी केन्द्र, नेकपा एकिकृत समाजवादी र जनमोर्चाले सर्मथन गरेका थिए । यसअघि वि.स. २०५६ मा म्याग्दीमा नेपाली काँग्रेसका उमेद्वार नारायणसिंह पुनले चुनाव जित्नुभएको थियो । म्याग्दीमा काँग्रेसले २३ वर्षपछि जित निकालेको हो । आइतबार भएको मतदानमा ८६ हजार १२० जना मध्य ५० हजार ६२५ (करिब ५८ प्रतिशत )मत खसेको थियो ।
