म्याग्दी । राष्ट्रिय गौरवको आयोजना बेनी–जोमसोम सडक अन्तरगत म्याग्दीको रघुगंगा गाउँपालिका–२, र ३, को सिमानामा पर्ने बैसरी अधेरीखोला क्षेत्रमा अवरुद्ध सडक बाह्र दिनपछि सञ्चालनमा आएको छ। सडक माथिबाट पहिरो खसेका कारण बैसरी अधेरीखोलामा आवरुद्ध भएको ७६ किलोमिटर दुरीको बेनी–जोमसोम सडक बुधबार बिहान १० बजेदेखि सञ्चालन भएको बेनी–जोमसोम–कोरला सडक आयोजनाले जनाएको छ ।
याे पनि…
आयोजनाका सुपरभाईजर ईन्द्रसिंह शेरचनले सडकमा खस्ने पहिरो र पानी व्यवस्थापनका साथै थुप्रिएको पहिरो हटाएर बैसरी अधेरीखोलामा यातायात सञ्चालन गरिएको जानकारी दिनुभयो । ‘सडक खुलेपछि रोकिएका सवारी साधनहरु गन्तब्यतर्फ लागेका छन्,’ उहाँले भन्नुभयो ‘मौसममा सुधार भएपछि सडक मर्मत र पहिरो पन्छाउने काम गर्न सकियो ।’
सडक देखि पाखो हुदै करिब पाँच सय मिटर माथि लगेको डोजर र खोल्साको पानी प्रयोग गरेर पहिरो रोकथामको काम गरिएको बेनी जोमसोम कोरला सडक आयोजनाका प्रमुख जगत प्रजापतिले बताउनुभयो ।छरिएको पानीको स्रोतलाई एककृति गरि बग्ने अवस्थामा रहेको जमिनमा डोजरले खोला बगाएर झारिरहेको आयोजना प्रमुख प्रजापतिले जानकारी दिनुभयो । उहाँका अनुसार यसरी करिब दुई सय मिटर लम्बाईको पहिरो बगाइएको छ। गेगर बगाएपछि पहिरो खस्ने ठाउँमा पहाड भेटिएको छ ।
भूमिगत पानीका कारण सिर्जना भएको पहिरो रोकथामका लागि आयोजनाले नयाँ अभ्यास गरेको प्रमुख प्रजापतिले बताउनुभयो । पानी र डोजर परिचालन गरेर जोखिमयुक्त ढुंगामाटो खसालिएको भागबाट पहिरो खस्न रोकिएको छ । पहिरो व्यवस्थापन गर्न प्रयोग भएको खोल्साको पानीलाई पाइप मार्फत सुरक्षित रुपमा खोल्साबाट बगायएको छ ।
पहिरो पन्छाउनका लागि साउन २८ गतेदेखि ३२ गतेसम्म बेनी–जोमसोम सडकको घुमाउनेताल–बेगखोला खण्डमा पूर्ण रुपमा यातायात बन्द गरिएको थियो । बैसरीको पहिरोले सडक अवरुद्ध हुँदा म्याग्दीको रघुगंगा, अन्नपूर्ण गाउँपालिका र मुस्ताङका बासिन्दाका साथै पर्यटक र तिर्थयात्रीलाई आवत जावत गर्न समस्या भएको थियो ।
बेनीदेखि पोखरेबगरतर्फ जाँदै गरेको ग १ ज ६८२० नम्बरको जिप गुडिरहेको अवस्थामा पहिरो खसेर चालक अन्नपूर्ण गाउँपालिका–७ महभिरका ४० वर्षीय लुकजन शेरपुजा घाइते हुनुभएको थियो । पहिरोले पुरेको जिप निकालिएको छ । सवारी धनी समेत रहेका शेरपुञ्जाको पोखराको मणिपाल शिक्षण अस्पतालमा उपचार भइरहेको छ ।
