दरबाङ । प्रतिनिधि सभा सदस्य सांसद खमबहादुर गर्बुजा ‘ खम्बिर’ले खेलकुद प्रतियोगिताले मानिसको शारीरिक, मानसिक र सामाजिक स्वास्थ्यमा व्यापक प्रभाव पार्ने बताउनुभएको छ । बुधबार दरबाङमा नेपाल तरुणदल म्याग्दीद्धारा आयोजित प्रथम तरुण कपको उद्घाटन गर्दै कांग्रेस म्याग्दीका सभापति समेत रहनुभएका सांसद गर्बुजाले यसको नियमित अभ्यासले मानिसलाई स्वस्थ जीवनशैली अपनाउन, तनाव कम गर्न, आत्मविश्वास बढाउन र सामाजिक सञ्जाल बलियो बनाउन मद्दत गर्ने बताउनुभएको हो । साथै उहाँले खेलकुद क्षेत्रको विकास र प्रवद्र्धका लागि आफुले पहल गर्ने प्रतिबद्धता जनाउनुभयो ।
सांसद गर्बुजाले आफु निर्वाचित भएपछि जिल्लाको विकासका लागि काम गरिरहेको बताउनुभयो । उहाँले आफ्नो पहलमा दरबाङ –धारापानी सडक कालोपत्रे , तातोपानी बजार संरक्षण , बेनी बजार संरक्षण , खानेपानी, भगवती खानेपानी लगायत थप ठुला आयोजनाहरुको स्रोत सुनिश्चितता भएको र केही दिनमै ठेक्का आह्वान हुने जानकारी दिनुभयो । यसैगरी फापरखेत पहिरोमा बेलीब्रिज एक वर्ष भित्रमा बन्ने उद्घोष गर्नुभयो । दरबाङ बजार कालोपत्रेका लागि पहल गर्ने उहाँले प्रतिबद्धता जनाउनुभयो । ‘‘म निर्वाचित भएर आएपछि ४८ करोडको बृहत घोप्टेखोला खानेपानी आयोजना सहित पहिलेको तुलानामा धेरै आयोजनाहरु जिल्लामा भित्रिएका छन् । थप ठुला विकास निर्माणका आयोजनाहरु ल्याउनका लागि प्रदेश सरकारका मुख्यमन्त्री र संघीय मन्त्रालयहरुमा पहल गरिरहेको छु ,’’ उहाँले भन्नुभयो ,‘‘ जिल्लाबासीको माग र आवश्यकतालाई सम्बोधन गर्न लागिपर्दा पनि मेरा विरुद्ध नकरात्मक प्रचार बढी भएको देख्छु । ’’ जिल्लाको विकासका लागि सबै राजनितिक दलहरु एक हुनुपर्नेमा उहाँले जोड दिनुभयो ।
उद्घाटन सत्रमा प्रतिनिधिसभा सदस्य रेशमबहादुर बानियाँ, नेपाली कांग्रेस म्याग्दीका उपसभापतिद्धय हरिकुमार श्रेष्ठ, केबी भण्डारी ,तरुण दलका केन्द्रिय सदस्य शिव केसी, धवलागिरी गाउँपालिका अध्यक्ष प्रेमप्रसाद पुन,मालिका गाउँपालिका अध्यक्ष बेगप्रसाद गर्बुजा , कांग्रेस प्रदेशसभा (ख)का सभापति टंकप्रसाद पुन ,नेपाली कांग्रेस प्रदेश सभा (ख) सचिव हिरा पुन ,म्याग्दी भलिबल संघका अध्यक्ष तेजिन्द्र बानियाँ ,नेविसंघ केन्द्रीय सदस्य निर्मल खत्री , तरुदल जिल्ला सचिव सुमन बानियाँ , कांग्रेस म्याग्दीकी नेतृ तुल्सी पुर्जा , तरुदल म्याग्दीका उपाध्यक्ष सोहन श्रेष्ठ ,तरुदल नेता राजु जुग्जाली , भलिबल संघ मालिका अध्यक्ष नरेश पुन लगायतले मन्तब्य राख्नुभएको थियो । प्रतियोगिताको उद्घाटन प्रमुख अतिथी सांसद गर्बुजाले मुख्य रेफ्रि खड्ग केसीलाई बल हस्तान्तरण गरी खेलको उद्घाटन गर्नुृभएको थियो। । प्रदेशसभा निर्वाचन क्षेत्र (ख)मा पर्ने तीन पालिकाको वडा स्तरीय भलिवल प्रतियोगितामा १८ समूहले सहभागिता जनाएका छन् । उद्घाटनको पहिलो दिन मालिका–२,धवलागिरी गाउँपालिका–३,मंगला–३,मालिका–४, र अर्मन बीले विजयी सुरुवात गरेका छन् ।
प्रतियोगितामा प्रथम हुनेलाई नगद एक लाख ११ हजार एक ११ र द्धितीय हुनेलाई नगद ६६ हजार छ सय ६६ को साथमा ट्रफि, मेडल र प्रमाणपत्रद्धारा पुरस्कृत गरिने तरुण दलका जिल्ला सचिव नगेन्द्र मल्लले जानकारी दिनुभयो । प्रतियोगिताको उद्घाटन कार्यक्रममा मालिका गाउँपालिका अध्यक्ष बेगप्रसाद गर्बुजा, नेपाली कांग्रेसका जिल्ला, क्षेत्रीय तथा स्थानीय नेताहरुको उपस्थिती रहेको थियो ।
उद्घाटन सत्रको अध्यक्षता तरुण दल म्याग्दीका अध्यक्ष श्रीप्रसाद रोका, स्वागत उपाध्यक्ष सोहन श्रेष्ठ र सञ्चालन सचिव नगेन्द्र मल्लले गर्नुभएको थियो । त्यसैगरी फागुन १४ गतेदेखि उत्तरी म्याग्दीको अन्नपूर्ण गाउँपालिकाको वडा नम्बर ४ नारच्याङमा अन्तर पालिका जिल्लास्तरीय महिला भलिबल प्रतियोगिता आयोजना गरिएको तरुण दल म्याग्दीका सचिव सुमन बानियाँले जानकारी दिनुभयो ।
महिला भलिबल प्रतियोगीतामा प्रथम हुनेले ७७ हजार ७७७ र द्धितिय हुनेले ४४ हजार ४४४ ट्रफी मेडल र प्रमाण पत्र पाउने सचिव मल्लले जानकारी दिनुभयो । प्रतियोगिताका लागि १५ लाख ५० हजार रुपैयाँ बढी खर्च अनुमान गरिएको छ । आयोजनाबाट खर्च कटाएर आम्दानी भएको रकमले दुर्गम क्षेत्रलाई लक्षित गरेर शिक्षा,स्वास्थ्य लगायत क्षेत्रमा खर्च गर्ने अध्यक्ष रोकाको भनाई छ । प्रतियोगितामा राष्ट्रिय तथा स्थानीय कलाकार प्रस्तुत सहित नृत्य समेत रहेको छ ।
