बेनी ,आइतबार फागुन १८ गते ।
नेपाल मगर विद्यार्थी संघको रजत जयन्ती तथा एघारौं राष्ट्रिय विस्तारित भेला म्याग्दीमा हुने भएको छ । म्याग्दीको सदरमुकाम बेनी बजारमा आगमी फागुन २७ र २८ गते संघले आइतबार बेनीमा पत्रकार भेटमा भेलाको तयारीको बारेमा जानकारी गराएको हो ।
संघको ९ बुदे प्रस्तावमा छलफलका लागि विस्तारित भेला बोलाइएको अध्यक्ष बिष्णुकुमार थापाले जानकारी दिए । भेलामा मातृभाषामा पठनपाठन, निशूल्क उच्च शिक्षाको व्यवहारिक कार्यान्वयन, स्वायत्त विश्व विद्यालय स्थापना, शैक्षिक गुणस्तर सुधार र रोजगारमुलक शिक्षा, लोक सेवा आयोगको विज्ञापनलाई समावेशी बनाउने लगायतका विषयमा छलफल गरिने भएको छ ।
देशभरबाट ६५० जना प्रतिनिधिहरुको सहभागिता रहने भेला जिल्ला समन्वय समितिको सभाहलमा सञ्चालन गरिने भएको छ । भेलाको तयारीका लागि विभिन्न उपसमिति गठन गरेर प्रचारप्रसार, आर्थिक संकलन र व्यवस्थापनको तयारी सुरु गरेको अध्यक्ष थापाले बताउनुभयो ।
भेलाको अवसरमा सांगठनिक प्रशिक्षण, मौलिक सामुहिक नृत्य, वक्तृत्वकला, निबन्ध लेखन प्रतियोगिता पनि आयोजना गरिएको संघका महासचिव प्रेम रोकामगरले जानकारी दिनुभयो । नेपाल मगर संघ म्याग्दीका सचिव खम थापा मगरले भेला सफल बनाउन स्थानीय स्तरमा सहयोग गरिने बताउनुभयो ।
