काठमाडौँ । नेपाली कांग्रेसका नेता प्रकाशमान सिंहले कांग्रेसले सरकारमा हुँदा गरेका राम्रा कामबारे मतदातालाई भन्नुपर्ने बताउनुभएको छ । घरदैलो अभियानअन्तर्गत आज संखमुलमा भएको कार्यक्रममा बोल्दै उहाँले चुनाव वैशाख ३० मै हुने भएकोले तयारीमा जुट्न नेता तथा कार्यकर्तालाई आग्रह गर्नुभएको छ ।
चुनाव सर्छ कि भन्ने भ्रम नपाल्न उहाँले आग्रह गर्नुभएको थियो । साथै उहाँले मुलुकमा संकट परेका बेला नेतृत्व गर्ने पार्टी कांग्रेसमात्रै भएको बताउनुभएको थियो। ‘देशलाई संकट पर्दा काम गर्न नसक्ने र महत्वपूर्ण निर्णय लिनु पर्ने बेला ढुलमुले कुरा गर्ने अनि क्रान्तिकारी भाषण गर्ने ?,’ उहाँले भन्नुभयो, ‘अब जनताले देश र जनताको हित कुन पार्टीले गर्छ भन्ने छुट्याउने बेला आएको छ।’उहाँले पार्टीले गरेका महत्वपूर्ण कामबारे जनतालाई जानकारी दिनुपर्ने बताउनुभयो। ‘हामीले काम गरेका छौं, थाहा पाइहाल्छन् नि भनेर हुन्न,’ उहाँले भन्नुभयो, ‘मतदातालाई राम्रोसँग बुझाउनुपर्छ।’ सेतोपाटीबाट
