बेनी । म्याग्दीको अन्नपूर्ण गाउँपालिका–४, नारच्याङस्थित अन्नपूर्ण प्रथम हिमालको आधार शिविरमा दौड प्रतियोगिताको आयोजना गरिएको छ ।पहिलो आरोही मौरिस हर्गोजको नाममा पहिचान गरिएको पदमार्ग प्रर्वद्धनको अभियान अन्तरगत समद्री सतहदेखि ४१ सय ९० मिटर उचाईमा आयोजित प्रतियोगितामा पत्रकार सन्दिप रिजाल प्रथम, अन्नपूर्ण गाउँपालिका फिल्ड सहायक यामप्रसाद पूर्जा द्धितिय र प्रभु बैंक पोखरेबगरका सहायक कर्मचारी बिष्णुप्रसाद रिमाल तृतिय हुनुभएको थियो ।
प्रतियोगितामा कार्यपालिकाका सदस्य, पर्यटन व्यवसायी र पत्रकारहरु सहित ३० जनाले सहभागिता जनाएका थिए । सोही अवसरमा आयोजित छेलो प्रतियोगितामा अन्नपूर्ण गापाका फिल्ड सहायक यामप्रसाद पूर्जाले प्रथम हुनुभयो ।
प्रतियोगितामा विजेतालाई वडा नं ४ का वडा अध्यक्ष लोकबहादुर फगामी, वडा नं ७ मईलन पूर्जा पुन र वडा नं ८ का अध्यक्ष खमबहादुर गर्बुजा र प्रमुख प्रशासकीय अधिकृत सुवेदीले नगद, दोसल्ला र प्रमाणपत्रले सम्मान गर्नुभएको थियो । अन्धनिशान प्रतियोगिता समेत सञ्चालन गरिएको थियो । अन्नपूर्ण आधार क्षेत्रभित्रको सम्भावनाको पहिचान, आवश्यक पूर्वाधार विस्तारका लागि गरिएको पदयात्राको क्रममा प्रतियोगिताको आयोजना गरिएको गाउँपालिकाका प्रमुख प्रशासकीय अधिकृत सुबेदीले बताउनुभयो ।
मोटर गुड्ने सडक सञ्जाल र मानव वस्ती देखि टाढा रहेको आधार शिविर जाने पदमार्गमा बाटो, पुल, आश्रयस्थल, सञ्चार लगायतका पूर्वाधार निर्माणका लागि अध्ययन थालिएको प्रमुख प्रशासकीय अधिकृत सुवेदीले बताउनुभयो । आठ हजार ९१ मिटर विश्वको १० औ अग्लो अन्नपूर्ण हिमालको सन् १९५० जुन ३ तारिकका दिन फ्रान्सका मौरिस हर्गोजले अन्नपूर्ण प्रथम हिमालको आरोहण गर्नुभएको थियो। ८ हजार मिटर भन्दा अग्लो पहिलो मानव पाइला परेको जेठो हिमाल हो ।
