बेनी ।जिल्ला प्रहरी कार्यालय म्याग्दीको हिरासत कक्षमा नै पुस्तकालय स्थापना गरिएको छ । लायन्स क्लव अफ बेनी लभ्लीहिलले शनिबार सामाजिक उत्तरदाहित्व अन्तरगत विभिन्न मुद्दामा न्यायिक हिरासतमा रहेका थुनुवा बन्दीलाई लक्षित गरी पुस्तकालयको स्थापना गरेको हो । पुस्तकालयको लायन्स क्लव अफ ३२५ ‘बि’ आई नेपालका रिजन पर्सन अर्जुन पौडेलले प्रहरी नायव उपरीक्षक मदन कुँवरलाई ५ सय थानभन्दा बढी पुस्तक हस्तान्तरण गरेका थिए ।
पुस्तकालय उद्घाटन कार्यक्रममा लायन्स क्लवका रिजन पर्सन अर्जुन पौडेल (निरजन)ले लायन्सले समुदायस्तरमा आवश्यकता अनुसारका क्षेत्रमा सहयोग गर्ने गरेको बताए । त्यस्तै प्रहरी नायव उपरीक्षक मदन कुँवरले पुस्तकालयले प्रहरी र थुनुवाको दैनिकीलाई समेत सघाउने,आचरण र व्यवहारमा परिवर्तन गर्न सहयोग पु¥याउने बताए ।
पुस्तकालय स्थापना कार्यक्रममा लायन्स क्लव अन्तराष्ट्रियका एवजी खम थापा,लायन्स क्लव अफ दोभानकी अध्यक्ष जमुना केसीले पुस्तकालयको प्रयोगलाई प्रोत्साहन गर्न सकेमा पठन संस्कृतिमा परिवर्तन ल्याउन सकिने बताएका थिए । हिरासत कक्षमा रहेका थुनुवा, प्रहरी कार्यालयमा कार्यरत प्रहरी अधिकृत तथा जवानहरूका साथै थुनुवालाई भेट्न आउनेहरूलाई समेत लक्षित गरी पुस्तकालय स्थापना गरिएको लायन्स क्लव अफ बेनी लभ्लीहिलका अध्यक्ष नेत्रराज सुबेदीले बताए ।
लायन्स क्लव अफ बेनी लभ्लीहिलका संस्थापक अध्यक्ष अर्जुन पौडेलले आफ्नो जन्मदिनको अवसरमा स्थापना गरिएको पुस्तकालयमा पुस्तक राख्ने र पुस्तक खदिर तथा सहयोग जुटाएका थिए । पुस्तकालयमा नेपालका प्रसिद्ध लेखकहरूकको साहित्यिक पुस्तक समेत छन् । पुस्तकालय उद्घाटन कार्यक्रमको अध्यक्षता क्लवका अध्यक्ष सुबेदी, स्वागत उपाध्यक्ष विश्वास श्रेष्ठ र सञ्चालन सचिव निर्मल खत्रीले गरेका थिए ।
