भोजपुर । मिलको फित्तामा सल बेरिएर भोजपुरमा एक महिलाको मृत्यु भएको छ। रामप्रसाद राई गाउँपालिका-१ ओख्रेकी ७६ वर्षीया कुमारी बानियाँको धान कुट्ने मिलको फित्तामा सल बेरिँदा घाइते भई उपचाररत रहँदा मृत्यु भएको हो।
शनिबार साँझ ५ बजे सोही स्थानका योगेन्द्र राईको विद्युतीय लाइनबाट चल्ने मिलमा धान कुटाउने क्रममा बानियाँले घाँटीमा लगाएको सल मिलका फित्तामा बेरिँदा घाइते भएकामा उपचारका क्रममा स्थानीय संगीता मेडिकल ओख्रेमा गएराति साढे ९ बजे मृत्यु भएको जिल्ला प्रहरी कार्यालयले जनाएको छ।
शव परीक्षणका लागि आइतबार जिल्ला अस्पताल ल्याइँदै गरेको भोजपुर प्रहरीले जनाएको छ। रासस
