बुटवल । महान्यायाधीवक्ता खम्मबहादुर खातीले देशमा जतिसुकै परिवर्तन भए पनि नागरिकले न्याय क्षेत्रमा सुधार भएको महसुस गर्न नसकेको बताउनुभएको छ ।
कुनै पनि परिवर्तनको अनुभूति नागरिकले गर्न पाएमात्रै त्यसको सार्थकता हुने भन्दै उहाँले जनताले न्याय क्षेत्रमा भएको परिवर्तनको अनुभूति गर्न नपाएको बताउनुभयो । उच्च सरकारी वकिल कार्यालय बुटवलको नवनिर्मित भवनको उद्घाटन गर्दै महान्यायाधीवक्ता खातीले न्याय सेवालाई सबै नागरिकको पहुँचमा पुर्याउन सकेमात्रै न्याय क्षेत्रमा परिवर्तन भएको बुझ्न सकिने बताउनुभयो।
‘देशका सबै जसो जिल्लाका कारागार र त्यहाँ राखिएका कैदी बन्दीहरूको अवस्था दयनीय छ, सरकारले कारागार र कैदी बन्दीहरूको व्यवस्थापनमा विशेष ध्यान दिनुपर्ने आवश्यकता छ,’ उहाँले भन्रनुभयो । महान्यायाधीवक्ता खातीले देशमा तीन तहका सरकार भए पनि आपसमा समन्वय हुन नसक्दा जनताले पाउनुपर्ने सेवाहरू पनि सहज रूपमा पाउन नसकेको बताउनुभयो ।
‘अहिले देशमा तीन तहका सरकार छन्, तर सरकारकै बीचमा समन्वय हुन नसक्दा जनताले पाउनुपर्ने सेवा पाउन सकेका छैनन्,’ खातीले भन्रनुभयो । उहाँले सरकारले न्याय क्षेत्रमा सीमित बजेट छुट्याउने गर्दा न्याय सम्पादनमा समेत असर परेको उल्लेख गर्दै यस्तो अवस्थामा न्याय क्षेत्रले पनि निष्ठावान, कर्तव्यनिष्ठ र इमान्दारिपूर्वक काम गर्नुपर्ने बताउनुभयो।
‘न्याय क्षेत्रको सुधारको लागि न्याय क्षेत्रमा काम गर्ने न्यायमूर्तिहरू, सरकारी वकिल, अनुसन्धानकर्ता तथा सबै राष्ट्र सेवक कर्मचारीको समेत पुरानो सोच र दृष्टिकोण नहटाई परिवर्तन हुन सक्दैन, हाम्रो जिम्मेवारी र इमान्दारितामा खोट नलगाउने गरी काम गरौं,’ उहाँले भन्रनुभयो । उहाँले न्याय क्षेत्रमा काम गर्नेहरूले आफ्नो बानी व्यवहार र आचरणलाई सुन्दर बनाउन सकेमात्रै त्यहाँबाट सम्पादन गर्ने सेवाहरू सुन्दर बन्न सक्ने बताउनुभयो ।
उहाँले नागरिकलाई सर्वसुलभ सेवा प्रदानका लागि प्रविधिको उच्चतम प्रयोग गर्न पनि आग्रह गनुर्भयो । नायब महान्यायाधीवक्ता पदमप्रसाद पाण्डेले नयाँ भवनमा काम गर्ने न्यायकर्मी र कर्मचारीहरूको सोच र आचारणमा पनि नयाँपन आउनुपर्ने बताउनुभयो। ‘पुराना भवन भत्काएर नयाँ भवन बनाएजस्तै, हामीले हाम्रा पुराना सोच र आचरणलाई समेत भत्काउन जरूरी छ,’ उहाँले भन्रनुभयो ।
२०७६ साल पुस १५ गते तत्कालीन महान्यायाधीवक्ता अग्निप्रसाद खरेलले शिलान्यास गरेको चार तलाको उक्त भवन ५ करोड ५९ लाख ९ हजार रुपैयाँको लागतमा निर्माण सम्पन्न भएको हो। दुई वर्षभित्र निर्माण सम्पन्न गर्ने गरी श्री रोयल कन्ट्रक्सन धनगढी कैलालीले ठेक्का सम्झौता गरेको थियो । उद्घाटनको अवसरमा समयमै भवन निर्माण पूरा गरेको भन्दै निर्माण कम्पनीलाई सम्मान समेत गरिएको थियो । सेतोपाटीबाट
