काठमाडौँ । नेकपा (माओवादी केन्द्र) का प्रमुख सचेतक देव गुरूङले चीनले नेपालमा वामपन्थी एकता चाहेको बताउनुभएको छ ।
गुरूङले वाम एकतामा चीनको स्वभाविक चासो हुने बताउनुभयो। ‘वाम एकतामा उसको स्वभाविक चासो हो। एउटा कम्युनिष्ट पार्टीले यस्तो अपेक्षा राख्नु र सुझाव दिनु नयाँ होइन,’ उहाँले भन्नुभयो,‘उनीहरूले नेपालको स्थिरता, स्थायित्वको र विकासको लागि कम्युनिष्टहरू मिल्दा राम्रो हुन्छ भन्ने सुझाव दिएका छन्।’
‘चाइना फाउन्डेसन फर पिस एन्ड डेभलपमेन्ट’ नामक संस्थाको निमन्त्रणामा गुरूङ चैत ११ गते चीन जानुभएको थियो । उहाँ मंगलबार नेपाल फर्किनुभएको छ। बेइजिङमा रहँदा नेताहरूसँग भेट्ने औपचारिक कार्यक्रम नभए पनि साँझ(बिहान अनौपचारिक छलफल भएको उहाँले बताउनुभयो।
गुरूङले चिनियाँ नेताहरूले अमेरिकी सहयोग परियोजना एमसिसी एसिया प्रशान्त रणनीति आइपिएसकै अंग भएको दाबी गरेको बताउनुभयो । संसदबाट घोषणा भएको १२ बुँदेले आइपिएसको अंग हो भन्ने रोक्नेमा आशंका रहेको समेत उनीहरूको भनाइ थियो।
‘यो क्षेत्रमा शान्ति, स्थिरता र समृद्धिको यात्रामा अघि बढ्नु पर्नेछ। अमेरिकाले आइपिसएको लाइनबाट सैन्य रणनीति योजना यो क्षेत्रमा ल्याउन खोजेको देखिन्छ। त्यसले शान्ति र विकासमा असर पर्न सक्छ भन्ने थियो,’ उहाँले भन्नुभयो,‘एमसिसी पारित हुनु दुई पक्षीय मामिला पर्यो तर उनीहरूको बुझाइ एमसिसी आइपिएसकै अंग हो भन्ने छ। एमसिसी पारित भएपछि आइपिएसको अभियान सुरू हुने त होइन भनेर उनीहरूले बुझेका छन्।’
थुप्रै अन्तर्राष्ट्रिय सम्झौतालाई अमेरिकाले नमानेको भन्दै चिनियाँहरूले १२ बुँदेको महत्व आफ्नै होला तर कुरालाई अमेरिकाले त नमान्ने हो कि भनेर आशंका गरेको गुरूङले बताउनुभयो । सेतोपाटीबाट
