सुरेन गुरुङ्ग
घोडेपानी,मंगलबार असोज १४ गते ।
म्याग्दी प्रवासी नेपाली संघ मोना अन्तराष्ट्रिय कार्यसमितिको तेस्रो महाधिवेशन सुरु भएको छ । विभिन्न शिलशिलामा प्रवासमा बसोबास गर्ने म्याग्दीलीहरुको साझा संस्था मोना अन्तराष्ट्रिय कार्यसमितिको तेस्रो महाधिवेशन जिल्लाको अन्नपुर्ण गाउँपालिका ६ घोडेपानीमा मंगलबार देखी सुरु भएको हो । तीन दिन सम्म संचालन हुने महाधिवेशनको संघिय सरकार महिला ,बालबालिका तथा ज्येष्ठ नागरिक मन्त्री थममाया थापाले उद्घाटन गर्नुभयो ।
मन्त्री थापाले महाधिवेशन सफलताको शुभकामना व्यक्त गर्नुभयो । प्रवाससमा पसिना बगाएर कमाएको पैसा जिल्लाको आर्थिक, सामाजिक , स्वास्थ्य, शिक्षा तथा मानविय क्षेत्रमा लगानी तथा सहयोग गरेर देश विकासमा इट्टा थप्ने काम गरेको बताउनुभयो । साथै उहाँले सरकारको समृद्ध नेपाल सुखी नेपालीको सपना साकार पार्न प्रवासी नेपालीहरुलाई लगानी गर्न आग्रह गर्नुभयो ।
‘लामो समय पछि देशमा स्थायी सरकार आएकाले लगानीको वातावरण बनेको छ’ मन्त्री थापाले भन्नुभयो । ‘सरकारको समृद्ध नेपाल सुखी नेपाली नारा साकार पार्न लगानीले मात्र सम्भव भएकाले प्रवासी म्याग्दीलीहरुलाई स्वदेशमा लगानी गर्न आग्रह गर्दछु ।’ जिल्लामा जलविद्युत ,कृषि , पर्यटन तथा विभिन्न क्षेत्रमा प्रयाप्त सम्भावना भएकाले लगानी गरी युवाहरुलाई स्वदेशमा बस्न सक्ने बातावरण निर्माण गर्नमा सहयोग गर्न समेत आग्रह गनुहुँदै लगानी सुरक्षितका लागि सरकारले सहयोग गर्ने प्रतिवद्धता व्यक्त गर्नुभयो ।
अहिले भ्रष्टाचार ,हिंसा ,बेरोजगार तथा शुसासन सरकारका लागि ठुलो चुनौती भएको बताउनुभयो । उहाँले भ्रष्टाचार नियन्त्रण र शुसासन कायम गर्न नितिगत निर्णय गरी कानुन निर्माण गरको जानकारी दिनुभयो । अहिलेको सरकार सबैभन्दा बढी भ्रष्टाचार नियन्त्रण गर्न सफल भएको उहाँले दावी गर्नुभयो । सरकारले देश विकासममा जोड दिएकाले सबैले साथ दिनुपर्नेमा जोड दिनुभयो ।
साथै महिला माथि हुने हिंसा बढेको बताउनुहुँदै यसको अन्त्यका लागि सरकारले महिला हिंसा विरुद्धको अभियानलाइ नितिगत रुपमा निर्णय गरी अगाडी बढाउन लागेको बताउनुभयो । सरकारले विकास निर्माणमा हुने कालोबजारीलाई नियन्त्रण गर्नका लागि कडा कदम चालेको बताउनुभयो । पहिले विकास निर्माणमा सडक निर्माण गर्दा दिइदै आएको अग्रिम भुक्तानीलाई घटाएको बताउनुभयो । पछिल्लो समय मेलाका नाममा हिंसात्मक गतिविधी बढेकाले नियन्त्रण गर्नका लागि कदम चाल्न स्थानीय सरकारलाइ निर्देशन दिनुभयो ।
कार्यक्रममा नेपाली कांग्रेस म्याग्दीका सभापति खमबहादुर गर्बुजा खम्बीर ,निवर्तमान सभापति एवम् संविधान सभा सदस्य सांसद रेशमबहादुर बानियाँ र नेकपा म्याग्दीका सचिव करिकृष्ण श्रेष्ठले प्रवासी म्याग्दीलीहरुले जिल्लाको विकास ,आर्थिक, सामाजिक , शिक्षा ,मानविय , स्वास्थ्य लगायत विभिन्न क्षेत्रमा पु¥याएको योगदान जिल्ला र देशका लागि नमुनायोग्य काम भएको बताउनुभयो ।
विदेशमा कमाएको पुँजी जिल्लाको विकासमा लगानी गर्न आग्रह गर्नुभयो ।
यसैगरी जिल्ला समन्वय समिति प्रमुख देवेन्द्रबहादुर केसी , बेनी नगरपालिकाका मेयर हरिकुमार श्रेष्ठ,मालिका गाउँपालिका अध्यक्ष श्री प्रसाद रोका ,अन्नपुर्ण गाउँपालिका अध्यक्ष क्याप्टेन डम बहादुर गर्वुजा पुन र प्रमुख जिल्ला अधिकारी ज्ञाननाथ ढकालले महाधिवेशन सफलताको शुभकामना व्यक्त गर्नुभयो ।
जिल्लामा कृषि ,पर्यटन ,जलविद्युत लगायत विभिन्न क्षेत्रमा पर्याप्त सम्भावना भएकाले प्रवासमा कमाएको पुँजी लगानी गर्न आग्रह गर्नुभयो । लगानी मैत्री वातावरण निर्माणका लागि स्थानीय सरकारले सहयोग गर्ने प्रतिबद्धता व्यक्त गर्नुभयो । क्याप्टेन गर्बुजा पुनले अन्नपुर्ण जलविद्युत र पर्यटनको प्रचुर सम्भावना बोकेको गाउँपालिका भएकाले विश्वको पर्यटकीय स्थल पुनहिल र जलविद्युतमा लगानी गर्न समेत आग्रह गर्नुभयो ।
कार्यक्रममा मोना अन्तराष्ट्रिय कार्यसमितिका अध्यक्ष चक्रबहादुर थापाले पर्यटकीय स्थल घोडेपानी र पुनहिलको पर्यटन प्रवद्र्धन र पुर्वाधार विकासमा लगानी भित्र्याउनका लागि घोडेपानीमा महाधिवेशनको आयोजना गएिको बताउनुभयो । उहाँले मोनाले जिल्लामा गरेका विभिन्न गतिविधी तथा कार्यक्रमका बारेमा जानकारी गराउनुभयो । मोनाले जिल्लाको आर्थिक ,सामाजिक ,स्वास्थ्य ,शिक्षा तथा मानविय क्षेत्र संगै अन्य उत्पादनमुलक क्षेत्रमा लगानी गर्न चाहेकाले लगानीमैत्री बातावरण निर्माण गरीदिन आग्रह गर्नुभयो ।
प्रवासमा कमाएको पुँजी स्वदेश र जिल्लामा लगानी गर्न चाहेपनि पनि लगानीमैत्री वातारण नभएको गुनासो गर्नुभयो । लगानीले मात्र विकास सम्भव भएकाले सबैले लगानीमैत्री वातावरण निर्माणमा सहयोग गर्नुपर्नेमा जोड दिनुभयो ।
अध्यक्ष थापाको अध्यक्षता,महासचिव मिम पुर्जाको संचालन र गैरआवासिय नेपाली संघ युकेका निवर्तमान अध्यक्ष तथा कार्यसमितिका सल्लाहकार योगकुमार फगामीको स्वागतमा सम्पन्न कार्यक्रममा मोनाका संस्थापक अध्यक्ष तेजप्रकाश पुन , मोना कतारका अध्यक्ष तिलु शर्मा ,मोना नेडरल्याण्डका अध्यक्ष एवम् महाधिवेशन व्यवस्थापक संयोजक जंगबहादुर पुन र वडा अध्यक्ष कृष्णप्रसाद बरुवाल लगायत विभिन्न संघ संस्थामा आवद्ध प्रतिनिधिहरुले बोल्नुभएको थियो । कार्यक्रममा मोनालाई सहयोग गर्ने व्यक्ती र विभिन्न क्षेत्रमा सक्रिय समाजसेवीहरुलाई सम्मान गरिएको थियो ।
