काठमाडौँ । नेकपा माओवादी केन्द्रको भ्रातृ संगठन योङ कम्युनिस्ट लीग (वाईसीएल) नयाँ नेतृत्व चयनमा असफल भएको छ । शनिबारदेखि हाइटेक प्रविधिमार्फत निकै तामझामका साथ राष्ट्रिय सम्मेलनको उद्घाटन गरेको वाईसीएलको सम्मेलन नेतृत्व चयन बिनै सकिन लागेको हो । वाईसीएलले नेतृत्व चयन नगरी केन्द्रीय कमिटीमात्रै घोषणा गर्ने तयारी गरेको छ।
वाईसीएलयका केन्द्रीय प्रचार विभाग प्रमुख पुष्प ओलीले केन्द्रीय कमिटी घोषणा गरेर राष्ट्रिय सम्मेलन सक्न लागिएको बताउनुभयो । उहाँले नेतृत्व चयन भने पछि बस्ने केन्द्रीय कमिटी बैठकले गर्ने बताउनुभयो । ‘सहमतिको लागि अधिकतम प्रयास भएपनि हाल नेतृत्व चयन हुन सकेन’, उहाँले भन्नुभयो, ‘आजै केन्द्रीय समिति घोषणा गरेर अध्यक्ष भने पछि बस्ने केन्द्रीय समितिबाट चयन गरिनेछ ।’
वाईसीएलको नेतृत्वमा सुवोधराज शेर्पाली र सुमन देवकोटाले दाबेदारी प्रस्तुत गर्दै आएका छन् । तर दुबैको नाममा सहमति हुन नसकेपछि समस्या भएको हो । निर्वाचन प्रक्रियाबाट नेतृत्व चयन नगर्ने र सहमति पनि नबन्दा यो विषयमा सहमति जुटाउने जिम्मा पार्टी अध्यक्ष प्रचण्डलाई दिइएको थियो । सोमबार बसेको स्थायी समिति बैठकले प्रचण्डलाई नेतृत्व चयन गर्ने जिम्मेवारी प्रचण्डलाई दिएको थियो ।
प्रचण्डले नै नेतृत्व चयन गर्ने भएपछि मंगलबार बिहान वाइसीएलको टोली प्रचण्डसँग छलफलका लागि खुमलटार पुगेको थियो । यो छलफलमा हाल केन्द्रीय समितिमात्र घोषणा गर्ने र पछि नेतृत्व चयन गर्नेगरी गृहकार्य गर्न प्रचण्डले निर्देशन दिएपछि सोहीअनुसार गर्न लागिएको बताइएको छ ।
२३१ जनाको केन्द्रीय कमिटी
वाईसीएलमा केन्द्रीय समिति २३१ जनाको हुनेछ भने ३५ जनाको पदाधिकारी हुने व्यवस्था छ । यसैगरी ३ वटा केन्द्रीय आयोग निर्माण गर्ने निर्णय पनि वाईसीएलको छ ।
नेपालको राष्ट्रिय भेलामा अध्यक्ष रामप्रसाद सापकोटा ुदीपशिखाु पेश गरेको संगठनात्मक संरचनासहितको प्रतिवेदन सम्मेलनबाट पास भइसकेको छ। समृद्धि, उत्पादन र विकास केन्द्रीत रहेर अहिले सम्मका उपलब्धिको रक्षा गर्दै संगठनलाई नयाँ प्रणाली मार्फत डिजिटलाइज्ड गर्दै जनजीवनको उत्थान गरी समाजवादी बाटोमा अगाडी बढ्ने निष्कर्ष सम्मेलनको रहेको छ ।
दीपशिखाले आफुले छोडेर नयाँ पुस्तालाई नेतृत्व हस्तान्तरण गर्ने निर्णय गरेका थिए । नयाँ नेतृत्वको लागि हाल महासचिव समेत रहेका शेर्पाली र उपाध्यक्ष समेत रहेका देवकोटाबीच बिच प्रतिस्पर्धा भएको हो । यद्यपि माओवादी केन्द्रका अध्यक्ष प्रचण्ड लगायतका अन्य नेताहरुले सहमति मै गर्न निर्देशन गरेका थिए । रातोपाटीबाट
