काठमाडौं । पछिल्लो २४ घण्टामा नेपालमा थप १ हजार ८ सय ९७ जनामा कोरोना भाइरस संक्रमण पुष्टि भएको छ । ११ हजार ६ सय ९ पीसीआर परीक्षण गर्दा १ हजार ४ सय ८८ जना र ४ हजार ३ सय ७० एन्टिजेन परीक्षण गर्दा ४ सय ९ गरी १ हजार ८ सय ९७ जनामा कोरोना भाइरसको संक्रमण देखिएको स्वास्थ्य तथा जनसंख्या मन्त्रालयले जनाएको छ ।
हालसम्म नेपालमा पिसिआर विधिबाट ७ लाख ७० हजार ७ सय ५९ जनामा र एन्टिजेन विधिबाट ८५ हजार ४ सय ५९ जनामा कोरोना संक्रमण पुष्टि भएको छ । यस्तै पछिल्लो २४ घण्टामा कोरोना संक्रमणबाट २० जनाको मृत्यु भएको छ भने १ हजार ७ सय ४३ जना निको भएका छन् । योसँगै नेपाल मृत्यु हुनेको संख्या १० हजार ८ सय ५८ पुगेको छ भने ७ लाख २८ हजार ९ सय २८ जना संक्रमणमुक्त भएका छन् । मन्त्रालयका अनुसार हाल देशभर सक्रिय संक्रमितको संख्या ३० हजार ९ सय ७३ जना रहेका छन् ।
