सुर्खेत । कर्णाली प्रदेशका मुख्यमन्त्री जीवनबहादुर शाहीले दलीय व्यवस्था अनुसार जाँदा सरकारलाई पूर्णता दिन ढिलाई भएको बताउनुभएको छ ।सोमबार कर्णाली प्रदेश सरकारले गरेका कामकारबाहीको बारेमा जानकारी दिन आयोजित पत्रकार सम्मेलनमा उहाँले गठबन्धनका आधारमा सरकार बनेकाले दलहरूबीच केही कुरा मिल्न बाँकी रहेको बताउनुभयो।
दलीय व्यवस्थामा गठबन्धनलाई मिलाउन केही समस्या हुन्छ, मन्त्रिपरिषद पूर्ण बनाउन केही समय लाग्यो,’ उहाँले भन्नुभयो, ‘सरकार पूर्ण भएको छैन, कामकारबाहीका हिसाबमा अपूर्ण पनि छैन।’मन्त्रालयमा मन्त्री नियुक्त नहुँदा कुनै काम रोकिने अवस्था हालसम्म नआएको मुख्यमन्त्री शाहीले बताउनुभयो। मुख्यमन्त्री शाहीले कर्णाली प्रदेश सरकारले कहिले पूर्णता पाउँछ भन्ने कुरा भने खुलाएका छैनन्।
हाल कर्णाली प्रदेशका आठ वटा मन्त्रालयमध्ये दुई वटामा मन्त्री नियुक्त हुनुभएको छ । भूमि व्यवस्था, कृषि तथा सहकारीमा नेकपा (एकीकृत समाजवादी) कर्णाली प्रदेश सभा दलका नेता चन्द्रबहादुर शाही र आर्थिक मामिला तथा योजना मन्त्रीमा माओवादीका विन्दमान विष्ट नियुक्त हुनुभएको छ। मुख्यमन्त्री र बाँकी पाँच वटा मन्त्रालय भने शाहीले आफैसँग राख्नुभएको छ । सेतोपाटीबाट
