सुर्खेत । सुर्खेतमा नेपाली काँग्रेस अनिर्णित बन्दा सत्तारुढ दलहरुबीचको गठबन्धन टुटेको छ । स्थानीय तहको निर्वाचनमा गठबन्धनबीच तालमेल गरेर जाने भनेर संयुक्त विज्ञप्ति निकालेको काँग्रेसले भागवण्डाको कुरामा लचकता नदेखाएको भन्दै नेकपा माओवादी केन्द्रले गठबन्धनको सम्भावना समाप्त भएको घोषणा गरेको छ ।
नेकपा माओवादी केन्द्र सुर्खेत इञ्चार्ज झकबहादुर मल्ल (सुदीप)ले सुर्खेतमा पाँच दलीय गठबन्धनबीच तालमेलको सम्भावना समाप्त भएको बताउनुभयो । उहाँले आफ्नो पार्टीका नेता तथा कार्यकर्ताहरूलाई एकल उम्मेदवारी दर्ता गराउने तयारीमा लाग्न आग्रहसमेत गर्नुभएको छ।
गठबन्धनभित्र तालमेल गरेर जाने कुरामा काँग्रेस अनुदार भएको भन्दै एकीकृत समाजवादी र माओवादीले आन्तरिक तयारी गरिसकेका थिए । मल्लले यसअघि नै मनोनयन दर्ताका लागि फारम ल्याएर वितरण गरिसकेको र आजै उम्मेदवारी दर्ता गरिने बताउनुभयो । रातोपाटीबाट
