बेनी । प्रतिनिधिसभा सदस्य सांसद खमबहादुर गर्बुजाको पहलमा बृहत घोप्टेखोला खानेपानी आयोजनाका लागि बजेट व्यवस्थापन भएको छ । सांसद गर्बुजाको पहलमा खानेपानीको सिफारिसमा संघीय खानेपानी तथा ढल व्यवस्थापन आयोजना म्याग्दी मार्फत कार्यान्वयन हुने गरि अर्थ मन्त्रालयले बृहत घोप्टे खोला खानेपानी आयोजनाका लागि ३८ करोड ५३ लाख २१ हजार रुपैयाँ बजेट स्विकृत गरेको हो ।
४८ करोड बढी लागत अनुमान गरिएको आयोजनाको कुल लागत मध्ये ८० प्रतिशत संघीय सरकारको लगानी र २० प्रतिशत उपभोक्ताको जनश्रमदान बराबरको रकम लगानी गर्नुपर्नेछ । उपभोक्ताको जनश्रमदान वापतको बजेट सम्बन्धीत स्थानीय तहले व्यवस्थापन गरेका छन् । सांसद गर्बुजाले खानेपानी मन्त्रालयले डिपिआर स्विकृत र अर्थले स्रोत सुनिश्चितता गरेर बहुबर्षीय ठेक्का आव्हान गर्न सहमति दिएको बताउनुभयो ।
उहाँले डिपिआर र बहुबर्षीयका लागि स्रोत सुनिश्चितता नहुँदा रोकिएको बृहत घोप्टेखोला खानेपानी आयोजना अब कार्यान्वयन हुने बताउनुभयो ।‘बृहत पिप्ले–भगवती खानेपानी आयोजनाका लागि पनि बजेट व्यवस्थापनका लागि पहल गरिरहेको छु ,’उहाँले भन्नुभयो,‘अबको केही समयपछि त्यो आयोजनाका लागि पनि बजेट व्यवस्थापन हुन्छ ।’बेनी –५,६,९,१० का विभिन्न बस्ती, रघुगंगा गाउँपालिका–६,पाखापानी र वडा नं ५ झीँलाई लक्षित गरी बृहत घोप्टेखोला खानेपानी आयोजनाको निर्माण गर्न सन २०२२ मा सर्वेक्षण भएको थियो ।
आयोजना मार्फत २ हजार ५५३ घरधुरीमा खानेपानी वितरण गर्ने लक्ष्य रहेको संघीय खानेपानी तथा ढल व्यवस्थापन आयोजना म्याग्दीले जनाएको छ । बजेटको स्रोत सुनिश्चितता भएकाले ठेक्का आव्हानको तयारी गरेको कार्यालयका प्रमुख सुनम थापाले जानकारी दिनुभयो । चालु आर्थिक वर्षमा घोप्टेखोला र पिप्ले–भगवति खानेपानी आयोजनाका लागि २र२ करोड रुपैयाँ बजेट बिनियोजन भएको छ । ठेक्का लगाउन कुल लागत अनुमानको २० प्रतिशत हुने गरि चालु आर्थिक वर्षमा बजेट रकमान्तर गर्न प्रस्ताव गरिएको छ ।
ठेक्का सम्झौता भएको दुई वर्षमा निर्माण सम्पन्न गर्ने लक्ष्य छ । रघुगङ्गा–६,पाखापानीको करेन्टखोलाको मुहानबाट पाइपलाइनमार्फत ल्याइएको पानीलाई पाखापानीकै शिरमा रहने ट्याङ्कीबाट वितरण पाइपमार्फत पाखापानी र त्यहाँबाट झीँ, पात्लेखेत, घतान, पुलाचौर हुँदै अर्थुङ्गे क्षेत्रसम्म खानेपानी सुविधा विस्तार गर्ने योजना रहेको छ ।
याे पनि…
म्याग्दीका दुई बृहत खानेपानी आयोजनाको काम छिट्टै अघि बढ्छ : सांसद गर्बुजा
