काठमाडौँ । नेपाली राष्ट्रिय क्रिकेट टोलीका सदस्य ज्ञानेन्द्र मल्लले आफू सधैंभरि कप्तान बन्नका लागि नआएको बताउनुभएको छ । मंगलबार बिहान ट्वान्टी–२० विश्वकप छनोटको प्रशिक्षणमा सहभागी हुने क्रममा त्रिवि क्रिकेट मैदानमा पत्रकारहरूसँगको कुराकानीमा पूर्वकप्तान मल्लले आफूले देशका लागि खेल्ने बताउनुभएको हो ।
नेपाल क्रिकेट संघ (क्यान) र खेलाडीबीच केही कुरामा असन्तुष्टि देखिए पनि विवाद भनेर चित्रित गरिएको उहाँले बताउनुभयो । उहाँले अब सबै खेलाडी विश्वकप छनोटमा केन्द्रित हुने पनि बताउनुभयो । उहाँले टिममा कसैसँग दुस्मनी नभएको उल्लेख गर्दै भन्नुभयो, ‘हामी एकअर्काबीच दुस्मनी छैन । १०–१२ वर्षदेखि हामी सबै सँगै खेलिरहेका छौँ कसैसँग मनमुटाव भएको होइन ।
बोर्ड र खेलाडीसँग पहिले नै यसरी छलफल भएको भए यत्रो दिन यस्तो अवस्था आउँथेन । वर्गीकरण गर्दा हामीलाई जानकारी गराइएको थिएन । त्यसैले अलिअलि असन्तुष्टि पैदा भएको हो ।’ त्यस्तै मल्लले आफूलाई बिनाजानकारी कप्तानबाट हटाउँदा दु:ख लागे पनि सधैं कप्तान बन्नुपर्छ भन्ने अडानमा नरहेको बताउनुभयो । उहाँले अगाडि भन्नुभयो, ‘सुरुमा बिनाकारण र जानकारी कप्तानबाट हटाइँदा अलिअलि दु:ख लाग्यो ।
अलि गाह्रो भएको थियो । हामी कहिल्यै पनि बोर्डविरुद्ध गएका होइनौँ । आत्मसम्मानका हिसाबले अलि अप्ठेरो महसुस भएको हो । सधैंभरि कप्तान बन्न भनेर आएको होइन । हुनुपर्छ भन्ने पनि होइन । म देशका लागि खेल्ने हो । मेरा लागि खेल्छु, परिवारका लागि खेल्छु मेरो मुख्य उद्देश्य नै त्यही हो ।’ त्यस्तै क्यानसँग खेलाडीहरूको प्रोत्साहन भत्ता बढाउने र ४ जना खेलाडीलाई गरिएको कारबाही फिर्ता लिने सहमति भएको पनि मल्लले जानकारी दिनुभयो ।
क्यानले सेन्ट्रल कन्ट्रयाक्टमा वर्गीकरणको विषयबारे सञ्चारमाध्यममा गएर बोलेका कारण कप्तान ज्ञानेन्द्र मल्ल र उपकप्तान दीपेन्द्रसिंह ऐरीलाई पदमुक्त गर्नुका साथै उनीहरूसहित सोमपाल कामी र कमलसिंह ऐरीलाई ६ महिना सेन्ट्रल कन्ट्रयाक्टमा नराख्ने निर्णय गरेको थियो । त्यसपछि क्रिकेट संघ र खेलाडीबीचको विवादले ठूलो रूप लिएको हो । त्यस्तै क्यानले मल्ल र ऐरीको कप्तान र उपकप्तान पद खोस्दै सन्दीप लामिछानेलाई नयाँ कप्तानको जिम्मेवारी दिएको थियो । ekantipur बाट
