बेनी, १८ चैत । नेकपा माओवादी केन्द्रले आगामी बैशाख ३० गते हुने स्थानीय तह चुनावमा म्याग्दीको मालिका गाउँपालिका–३ मा मोतिप्रसाद बुढालाई वडा अध्यक्षको उमेद्वार बनाउने भएको छ ।
डाडागाउँ स्थित माओवादीको वडा पार्टी कार्यालयमा शुक्रबार बसेको बैठकले बुढालाई वडा अध्यक्षको उमेद्वार बनाउने सर्वसम्मत निर्णय गरेको छ । वडा इञ्चार्ज बलबहादुर रोका, सचिव लालबहादुर घतानेको प्रस्तावमा युवा नेता बुढालाई वडा अध्यक्षको उमेद्वार बनाउने निर्णय भएको हो ।
बैठकमा माओवादी केन्द्रको जिल्ला समन्वय समिति म्याग्दीका संयोजक रेशम जुग्जालीले आसन्न स्थानीय तह चुनावमा पार्टीका उमेद्वारलाई जिताउन प्रचारप्रसार र जनभेटघाट अभियानमा जुट्न निर्देशन दिनुभयो ।
म्याग्दीमा माओवादीले पुरानो शक्ति फर्काउन अभियानमा जुटेको बताउदै उत्साहीत हुन आग्रह गर्नुभयो । भूगोल, समुदाय र लैङ्गिक हिसावले समावेशी हिसावले वडा सदस्यका उमेद्वार छनौट गर्ने माओवादीले जनाएको छ ।
माओवादीको बैठकमा आएका एमालेबाट गत निर्वाचनमा वडा अध्यक्ष जितेका हेमबहादुर पुनले उमेद्वार बनेका बुढाको टोलीसँगै हात समाएर एकाकार भएको तस्विर सार्वजनिक भएको छ ।
माओवादी केन्द्रले धवलागिरी गाउँपालिका– ६ मराङमा चक्र पुन, रघुगंगा गाउँपालिका– २ भगवतीमा नरबहादुर भण्डारी, मालिका गाउँपालिका–१ निस्कोटमा तिलक पुन, मालिका गाउँपालिका–४ मा रेशम पुन, मालिका–७ बिममा रविन जुग्जाली, धवलागिरी–७ ताकममा अशोक खत्रीलाई अध्यक्ष पदको उम्मेदवार टुंगो लगाइसकेको छ ।
बेनी नगरपालिका– ३ भकिम्लीमा हालका वडा अध्यक्ष पदम पुन र अन्नपुर्ण गाउँपालिका– २ का वडा अध्यक्ष ओमप्रसाद फगामीलाई पुनः वडा अध्यक्ष पदको उम्मेदवारमा दोहोराउने निर्णय गरेको छ ।
विस २०७४ सालको स्थानीय तहको चुनावमा आफूले जितेका ७ वटा वडालाई बचाउदै थप वडा र पालिका जित्ने लक्ष्य सहित चुनावी अभियान संग संगै उम्मेदवार छनौटलाई समेत तिब्र पारिएको माओवादी केन्द्र म्याग्दीका इञ्चार्ज गोविन्द पौडेलले जानकारी दिनुभयो । जिल्ला संयोजक रेशम जुग्जाली मालिका गाउँपालिकाको अध्यक्ष पदमा उम्मेदवारी दिने तयारीमा जुट्नुभएको छ । भएको छ भने कांग्रेसबाट वर्तमान गाउँपालिका अध्यक्ष श्रीप्रसाद रोका मगर तथा नेकपा एमालेबाट वर्तमान गाउँपालिका उपाध्यक्ष खरमाया विटालु र बेगप्रसाद गर्बुजा आकाँक्षी देखिनुभएको छ ।
