बेनी । म्याग्दीका नवनिर्वाचित प्रतिनिधि र प्रदेशसभाका सदस्यहरुले जिल्लाका अधुरा र अलपत्र योजनालाई पूर्णता दिन तत्कालै पहल थाल्ने बताउनुभएको छ ।पाँच दलीय गठबन्धनले बेनीमा बिहिबार आयोजना गरेको बिजय ¥याली पश्चातको सभालाई सम्बोधन गर्दै उनिहरुले भोट माग्ने क्रममा गरेको वाचा पुरा गर्ने प्रतिवद्धता जनाएका छन् ।प्रतिनिधिसभा सदस्यमा निर्वाचित नेपाली कांग्रेस म्याग्दीका सभापति खमबहादुर गर्बुजा ‘खम्विर’ ले जिल्लामा रोकिएका विकास र निर्माणका योजनाहरुलाई ६ महिनाभित्र सुचारु गराउने बताउनुभयो ।
‘म्याग्दीमा विकास निर्माणका काम अलपत्र छन् । ठेकेदार साथीहरुलाई लुकाएर राखेका छन्,’ उहाँले भन्नुभयो ‘अबको छ महिनाभित्र यी अलपत्र योजनालाई तिब्रताका साथ कार्यान्वयन हुने वातावरण बनाउछौ ।’युवाहरुको बेरोजगारको समस्या समाधानका लागि बिषेश योजना बनाउने र नीतिगत रुपमा पहल गर्ने प्रतिवद्धता जनाउनुभयो । विकासका नयाँ योजना र रोजगारीका अवसरहरु सृजना गर्ने वचनवद्धता व्यक्त गर्नुभयो । उहाँले अब जिल्लाले विकास निर्माणको क्षेत्रमा फड्को मार्ने दावी गर्नुभयो ।
प्रदेशसभा क्षेत्र (२) बाट निर्वाचित नेकपा माओवादी केन्द्रका जिल्ला संयोजक रेशम बहादुर जुग्जालीले सम्बृद्ध, सुन्दर र विकसित म्याग्दी बनाउन प्रतिस्पर्धी दलका नेताहरुलाई समेत सहकार्यको वातावरण बनाउन आव्हान गर्नुभयो ।‘म्याग्दीका जनताको विश्वास र आशालाई हामीले मर्न दिने छैनौ,’ उहाँले भन्नुभयो ‘संसदमा म्याग्देली जनताको समस्या उठान गरि समाधानको पहल गर्नुका साथै र जनताको अपेक्षा पुरा गरेरै छाड्छौ ।’ पाँच वर्षभित्रमा हामी भन्दा अगाडीका जनप्रतिनिधिले गर्नुभएको भन्दा धेरै र फरक किसिमको काम गरेर विकास र परिवर्तनको अनुभूति दिलाउने प्रतिवद्धता जनाउनुभयो ।
प्रदेशसभा क्षेत्र (१) बाट निर्वाचित नेकपा (माओवादी केन्द्र)का हरिबहादुर भण्डारीले म्याग्दी जिल्लाको विकासको सम्वाहक बन्ने र परिवर्तनको दियो बालेर गाउँ वस्तीमा आउने बताउनुभयो । ‘म्याग्दीको पूर्वाधार, सामाजिक र आर्थिक क्षेत्रमा परिवर्तन ल्याउन हामीले प्राथमिकता दिन्छौ,’ उहाँले भन्नुभयो ‘म्याग्दीमा विकासको सम्वाहक, जनताको दुखमा सेवक र सुखमा साथी बनेर आउनेछु ।’
नेकपा माओवादी केन्द्रका केन्द्रिय सदस्य तथा जिल्ला ईञ्चार्ज गोविन्द पौडेल, नेपाली काँग्रेसका नेता रेशमबहादुर बानियाँ, नेकपा एकिकृत समाजवादीका जिल्ला अध्यक्ष कृष्णकुमार विश्वकर्मा र जनमोर्चाका छवी विश्वकर्माले संविधानको रक्षा र कार्यान्वयनका साथै म्याग्देली जनताको विकासको भोक मेटाउने गरी काम गर्न जनप्रतिनिधिहरुलाई सुझाव दिनुभयो ।विजयी उमेद्वार र गठबन्धनमा आवद्ध दलका नेताहरुले मतदाताहरुलाई धन्यवाद दिनुभयो । म्याग्दीमा गठबन्धन कार्यान्वयनमा प्रभावकारी र इमान्दारीता देखिएको भन्दै नेता, कार्यकर्ता र मतदाताको प्रशंसा गर्नुभएको थियो । जनप्रतिनिधिहरुलाई खबरदारी र सहयोग गर्ने प्रतिवद्धता जनाउनुभयो ।
खुल्ला मञ्चमा सभा अघि पाँच दलीय गठवन्धनले बेनी बजारमा बाजागाजा सहित विशाल विजय ¥याली निकालेको थियो । मतदाताहरुले विजयी उम्मेदवारहरुलाई भव्य सम्मान सहित बधाई ज्ञापन गरेका थिए ।गठबन्धनको निर्वाचन परिचालन समितिका संयोजक तथा नेपाली काँग्रेस म्याग्दीका उपसभापति कर्णबहादुर भण्डारी (केवी)ले गत चुनावले म्याग्दीको राजनीतिक मात्र नभएर जनताको अवस्था र विकासमा परिवर्तन ल्याउने जनमत प्रकट गरेको बताउनुभयो । नेपाली काँग्रेस म्याग्दीका सचिव भरतबहादुर रकालले म्याग्दीमा काँग्रेसले २३ वर्षपछि प्रतिनिधिसभा जितेकोमा नेता कार्यकर्ताहरुमा खुसीयाली छाएको बताउनुभयो ।
याे पनि…
