म्याग्दी । नेपाल जेसीजको कार्यकारिणी उपाध्यक्ष पदमा म्याग्दीका सुजन बरुवालले उम्मेद्धारी घोषणा गर्नुभएको छ । नेपाल जेसीजको सन २०२३ का लागी हुने निर्वाचनमा म्याग्दीका सुजन बरुवालले राष्ट्रिय कार्यकारिणी उपाध्यक्ष पदमा उम्मेदवारी घोषणा गर्नुभएको हो । सन २०२१ मा नेपाल जेसीजको राष्ट्रिय उपाध्यक्ष समेत भैसक्नुभएका बरुवालले यस बर्ष पुस ७ देखि १० गतेसम्म बिरगंजमा हुन लागेको ४९ औँ राष्ट्रिय महाधिवेशनमा उम्मेदवारी दर्ता गरिसक्नुभएको छ ।
बरुवाल उम्मेदवार बन्नुभएको कार्यकारिणी उपाध्यक्षमा ४ जनाको पदमा ११ जनाले मनोनयन दर्ता गराएका छन् । सन २०१४ मा प्रस्तावित सदस्यको रुपमा म्याग्दी जेसीजमा आबद्ध हुनुभएका बरुवाल सन २०१५ मा साधारण सदस्य, सन २०१७ मा शाखाको उपाध्यक्ष, २०१८ मा कोषाध्यक्ष, २०१९ मा कार्यकारिणी उपाध्यक्ष र २०२० मा म्याग्दी जेसीजको शाखा अध्यक्ष भएर नेतृत्व सम्हाल्नुभएको थियो । उहाँले सन २०२२ मा म्याग्दी शाखाको कानुनी सल्लाहकार भएर समेत काम गर्नुभएको छ ।
कार्यक्रम संयोजक लगायतका जेसीज गतिविधिमा संलग्न भएर थुप्रै राष्ट्रिय अवार्डहरु समेत प्राप्त गरिसक्नुभएका बरुवालले युवाहरुको नेतृत्व, व्यत्तित्व र क्षमता विकासको क्षेत्रमा थप रचनात्मक कार्यहरु गर्नको लागि राष्ट्रिय कार्यकारिणी उपाध्यक्ष पदमा उम्मेदवार बनेको बताउनुभयो ।
नेपाल जेसीजमा यस अघि सन २०१५ मा म्याग्दीबाट धनञ्जयकुमार श्रेष्ठले राष्ट्रिय अध्यक्ष पदमा उम्मेदवार बनेर बिजय हाँसील गर्नुभएको थियो । नेपाल जेसीजमा १ अध्यक्ष, ४ कार्यकारिणी उपाध्यक्ष र १२ उपाध्यक्ष पदका लागि निर्वाचन हुने गर्छ । हरेक बर्ष नेतृत्व हस्तान्तरण हुने जेसीजमा एक व्यक्ति एक पदमा एक पटक मात्रै रहन पाउने प्रावधान रहेको छ ।
